✍️अख्तर काझी
दौंड: शहरातील भोईटे नगर येथे दुचाकीवरून आलेल्या चोरट्यांनी महिलेच्या गळ्यातील दोन तोळे वजनाचे सोन्याचे गंठण हिसकावून पळवून नेल्याची घटना समोर आली आहे. याप्रकरणी प्रतिभा संजय भंगारे(वय 49,रा. भोईटे नगर ,ओम हॉस्पिटल जवळ दौंड) यांनी फिर्याद दिली. दौंड पोलिसांनी दोन अज्ञात चोरट्यां विरोधात विरोधात भारतीय न्याय संहिता 2023 कलम 304( 2) प्रमाणे गुन्हा दाखल केला आहे.
दौंड पोलिसांनी दिलेल्या माहितीनुसार सदरची घटना 17 ऑक्टोबर 2026 रोजी सकाळी 9 वा.च्या दरम्यान भोईटे नगर येथील ओम हॉस्पिटल जवळ घडली. फिर्यादी आपल्या घरासमोर झाडू मारत असताना दोन युवक विना नंबर प्लेटच्या दुचाकी( हंटर )वर तेथे आले व त्यांनी फिर्यादी यांना विचारले की यहा कोई संजय राऊत रहता है क्या? तेव्हा फिर्यादी त्यांना म्हणाल्या की मला माहिती नाही, पुढे जाऊन विचारा. व त्या आपल्या कामाकरिता खाली वाकल्या, याच संधीचा फायदा घेत दुचाकी वर मागे बसलेल्या युवकाने क्षणात त्यांच्या गळ्यातील सोन्याचे दोन तोळ्याचे मिनी गंठण(कीं.रु.70 हजार) हिसकावून घेतले व तेथून चोरटे राज्य राखीव पोलीस दल गट क्रमांक 7 जवळील म्हसोबा मंदिराच्या दिशेने पळून गेले.
दौंड शहर व परिसरात या आधीही दुचाकीवरून आलेल्या चोरट्यांनी महिलांच्या गळ्यातील सोन्याचे दागिने हिसकावून पळवून नेल्याच्या घटना घडलेल्या आहेत. अशा प्रकारच्या चोऱ्या करण्यासाठी चोरटे विना नंबर प्लेटच्या गाड्यांचा वापर करत असल्याचे स्पष्ट होत आहे. त्यामुळे शहरात विना नंबर प्लेटच्या फिरणाऱ्या वाहनांवर पोलिसांनी नजर ठेवून त्यांच्यावर कारवाई करावी अशी मागणी होत आहे.
✍🏻मुख्य संपादक – संदिप बारटक्के
