✍️ अख्तर काझी
दौंड: दौंड शहरातील व्यापाऱ्यास सिगारेटचा माल देण्यासाठी बारामतीहून आलेल्या व्यापाऱ्याचे 1 लाख 40 हजार रुपये किमतीचे सिगारेटचे बॉक्स अज्ञात चोरट्याने चोरून नेल्याची घटना समोर आली आहे. याप्रकरणी सचिन विजय पवार(वय 29,रा. माळेगाव, बारामती) यांनी फिर्याद दिली. दौंड पोलिसांनी अज्ञात चोरट्या विरोधात चोरीचा गुन्हा दाखल केला आहे.
पोलिसांनी दिलेल्या माहितीनुसार, सदरची घटना दिनांक 28 सप्टेंबर 2026 रोजी दुपारी 12. 45 वा. च्या दरम्यान दौंड शहरातील सिंधी मंगल कार्यालय परिसरातील शिवसागर ट्रेडिंग दुकान परिसरात घडली. फिर्यादी आर बी सिगारेट एजन्सी मध्ये कामाला असून दौंड येथील दुकानदारांना सिगारेटचा माल पुरविण्याचे काम करतात. फिर्यादी 28 सप्टेंबर रोजी दुपारी 11 वाजता बारामती येथील सिगारेट चा माल घेऊन पाटस येथे गेले. पाटस मधील दुकानदाराला माल देऊन ते 12.45 वा. च्या दरम्यान दौंडला आले. यावेळी शहरातील शिवसागर ट्रेडिंगला सिगारेट चा माल देण्यासाठी त्यांनी आपली दुचाकी दुकानासमोर लावली व मालाची पिशवी घेऊन ते दुकानात गेले. यावेळी आपल्या सोबत असलेल्या सिगारेटच्या मालाची आणखीन एक पिशवी त्यांनी आपल्या दुचाकीला अडकविलेली होती. शिवसागर ट्रेडिंग चा माल देऊन अवघ्या पाच ते सात मिनिटातच फिर्यादी आपल्या दुचाकीकडे परतले असता दुचाकी ला अडकविलेली सिगारेटचा माल(32 बॉक्स, अंदाजे किंमत 1लाख 40 हजार 900 रु.) असलेली ती पिशवी त्यांना दिसली नाही. त्यामुळे त्यांनी परिसरात पिशवीचा शोध घेतला असता ती मालाची पिशवी त्यांना सापडली नाही. त्यामुळे त्यांची खात्री झाली की सिगारेटचा माल ठेवलेली पिशवी कोणीतरी अज्ञात चोरट्याने चोरून नेली आहे.
या चोरीच्या घटनेनंतर परिसरातील सीसीटीवी फुटेज तपासले असता चोरटा सिगारेटची पिशवी चोरताना स्पष्ट दिसत आहे. घटनेचा पुढील तपास पोलीस हवालदार नितीन बोराडे करीत आहेत.
✍🏻मुख्य संपादक – संदिप बारटक्के
