वृत्तवेध मarathi / संदिप बारटक्के
दौंड — दौंड शहराच्या क्रीडा क्षेत्रातील मानाचा तुरा मानल्या जाणाऱ्या ‘कि. गु. कटारिया २०-२० क्रिकेट स्पर्धेचा’ २८ वा यशस्वी अध्याय मोठ्या उत्साहात आणि थरारात पार पडला.
स्वातंत्र्यसैनिक स्व. बाबुशेठ बोरीकर यांच्या स्मृतीनिमित्त भिमथडी शिक्षण संस्था व सेंट्रल रेल्वे ज्युनिअर इन्स्टिट्यूट यांच्या संयुक्त विद्यमाने आयोजित या स्पर्धेने दौंडकर क्रीडाप्रेमींना उच्च दर्जाच्या क्रिकेटची पर्वणी दिली.
अंतिम सामन्यात पुण्यातील ‘गेम चेंजर’ संघाने नावाप्रमाणेच खेळाचे चित्र पालटवत दमदार कामगिरी करत विजेतेपदावर आपले नाव कोरले. त्यांनी भव्य चषकासह ₹ २,००,०००/- रोख पारितोषिक पटकावले. उपविजेतेपद KBNCA गुलबर्गा संघाला मिळाले. त्यांनीही उत्कृष्ट खेळाचे प्रदर्शन करत ₹ १,२१,०००/- रोख बक्षीस व चषक मिळवला.
ही स्पर्धा केवळ क्रिकेटपुरती मर्यादित न राहता दौंड शहरासाठी क्रीडा महोत्सव ठरली. थरारक सामने, उत्तुंग फटकेबाजी, अचूक गोलंदाजी आणि शिस्तबद्ध संघभावना यामुळे प्रत्येक सामना उत्कंठावर्धक ठरला. मोठ्या संख्येने उपस्थित असलेल्या क्रीडाप्रेमींनी खेळाडूंना भरभरून दाद दिली.
क्रिकेट स्पर्धेचा बक्षीस वितरण सोहळा आमदार राहुल कुल यांच्या हस्ते पार पडला. यावेळी बोलताना आमदार कुल यांनी सांगितले की, “अशा क्रीडा स्पर्धांमुळे ग्रामीण आणि निमशहरी भागातील गुणवंत खेळाडूंना व्यासपीठ मिळते. यामुळे युवकांमध्ये शिस्त, संघभावना आणि नेतृत्वगुण विकसित होतात.” यावेळी त्यांनी नवनिर्वाचित नगरसेवकांचाही विशेष सत्कार केला.
स्पर्धेत उत्कृष्ट कामगिरी करणाऱ्या खेळाडूंना पुढीलप्रमाणे सन्मानित करण्यात आले —
मालिकावीर: नौशाद शेख (₹ १०,०००/-)
सर्वोत्तम फलंदाज: अथर्व वणवे (MES पुणे)
सर्वोत्तम गोलंदाज: मोहम्मद खालिद (गुलबर्गा)
उदयोन्मुख खेळाडू: शुभम देवकाते
अंतिम सामनावीर: सूरज शिंदे
याशिवाय यष्टीरक्षक अनुराग वाजपेयी, पंच अशोक घोटपागार व इस्माईल पठाण, मॅच रेफरी रिझवान पटेल तसेच समालोचक अनिल नेवासकर आणि इतर तांत्रिक सहाय्यक यांनाही रोख रक्कम देऊन गौरवण्यात आले.
या सोहळ्यास भिमथडी शिक्षण संस्थेचे मानद सचिव प्रेमसुखजी कटारिया, उपाध्यक्ष गोविंदशेठ अग्रवाल, चेअरमन विक्रमशेठ कटारिया, संस्थेचे पदाधिकारी व सदस्य, साईराज सतीश माळी, संजय सोनवणे, दौंड नगरपरिषदेच्या उपनगराध्यक्षा छायाताई थोरात तसेच नागरिक हित संरक्षण मंडळाचे सर्व नगरसेवक व मोठ्या संख्येने क्रीडाप्रेमी उपस्थित होते.
गेली २८ वर्षे सातत्याने सुरू असलेल्या या स्पर्धेचे आयोजन अत्यंत शिस्तबद्ध व दर्जेदार पद्धतीने करण्यात आले. रेल्वे प्रशासनाचे सहकार्य, मैदान सेवक अब्बीभाई यांचे परिश्रम आणि स्वयंसेवकांच्या अथक मेहनतीमुळे ही स्पर्धा यशस्वी ठरली. आयोजक समितीने रेल्वे प्रशासन, नगरपालिका कर्मचारी व महाविद्यालयीन कर्मचाऱ्यांचे आभार मानले.
या स्पर्धेचे संपूर्ण नियोजन राजेश पाटील, नगरसेवक गटनेते योगेश कटारिया, माधव बागल व संपूर्ण टीम, फारुख शेख व संपूर्ण टीम, प्राचार्य सुभाष समुद्र, श्रीकृष्ण ननवरे तसेच के. जी. कटारिया महाविद्यालयाच्या संपूर्ण स्टाफ यांनी यशस्वीपणे पार पाडले.
दौंडच्या या क्रीडा महोत्सवाने पुन्हा एकदा सिद्ध केले की, उत्कृष्ट खेळ आणि उत्तम नियोजन यांचा संगम झाला की क्रीडा संस्कृती अधिक समृद्ध होते.
✍🏻मुख्य संपादक – संदिप बारटक्के
