वृत्तवेध मarathi / संदिप बारटक्के
दौंड शहरातील संस्कार प्रायमरी अँड हायस्कूल येथे वार्षिक स्नेहसंमेलन व ‘विविध गुणदर्शन’ कार्यक्रम मोठ्या उत्साहात आणि दिमाखात पार पडला.
शालेय विद्यार्थ्यांनी आपल्या सुप्त कलागुणांचे प्रभावी सादरीकरण करत उपस्थितांची मने जिंकली. कार्यक्रमाची सुरुवात दीपप्रज्वलन आणि सरस्वती पूजनाने करण्यात आली.
यावेळी कार्यक्रमाला प्रमुख पाहुणे म्हणून आमदार राहुल कुल, नगरसेवक योगेश कटारिया, जिवराज पवार, अमोल काळे, डॉ. शलाखा लोणकर, डॉ. रोहन खवटे, युवा नेतृत्व सतीश थोरात, नगरसेवक वसीम शेख, निलेश पवार, नगरसेविका सौ. वैशाली माशाळकर, सौ. रुचिता कटारिया, नगरसेवक राजू बारवकर, बंटी शिंदे आदी मान्यवर उपस्थित होते.
विद्यार्थ्यांनी स्वागतगीत, विविध लोकनृत्ये आणि सांस्कृतिक कार्यक्रम सादर करत रंगत आणली. श्री./सौ. धर्माधिकारी यांनी अजितदादा यांच्या जीवनावर आधारित जिवंत देखावा सादर केला. या सादरीकरणामुळे सभागृहातील अनेकांचे डोळे पाणावले आणि उपस्थितांनी उभे राहून टाळ्यांचा कडकडाट केला.
कार्यक्रमात मुख्यमंत्री देवेंद्र फडणवीस,उपमुख्यमंत्री अजित पवार, एकनाथ शिंदे तसेच ‘कांतारा’ या चित्रपटातील पात्रांची प्रभावी साकारणी करण्यात आली. या पात्रांच्या वेशभूषेसाठी कलाशिक्षक संतोष वाखरकर यांनी विशेष परिश्रम घेतले.
‘महाराष्ट्राची हास्यजत्रा’ या विषयावर आधारित नाटिकेला प्रेक्षकांनी उभे राहून भरभरून दाद दिली. तसेच छत्रपती शिवाजी महाराजांचे पराक्रमी सरदार तानाजी मालुसरे यांच्यावर आधारित नाटिकेदरम्यान सभागृह घोषणांनी दणाणून गेले. सर्व नृत्य व नाटिकांसाठी रोहित सर, केदार सर, श्री./सौ. धर्माधिकारी, मदने सर यांचे विशेष सहकार्य लाभले.
यावेळी आमदार राहुल कुल यांनी आपल्या भाषणात सांगितले की, “केवळ पुस्तकी ज्ञान महत्त्वाचे नसून विद्यार्थ्यांच्या सर्वांगीण विकासासाठी कला आणि क्रीडा क्षेत्राची जोड आवश्यक आहे.” त्यांनी संस्थेच्या प्रगतीचे कौतुक करत पुढील वाटचालीस शुभेच्छा दिल्या.
कार्यक्रमादरम्यान सुनिता मिनिगी यांनी शाळेच्या प्रगतीचा अहवाल सादर केला. सूत्रसंचालन कुबेर पवार व अनुष्का शेलार यांनी केले, तर सुशांत पवार यांनी आभार प्रदर्शन केले.
संपूर्ण कार्यक्रम यशस्वी करण्यासाठी शाळा व्यवस्थापन, शिक्षकवर्ग व शिक्षकेतर कर्मचारी यांचे मोलाचे योगदान लाभले. विद्यार्थ्यांच्या कलागुणांनी सजलेला हा ‘विविध गुणदर्शन’ सोहळा उपस्थितांच्या मनात दीर्घकाळ स्मरणात राहील, अशी भावना व्यक्त करण्यात आली.
✍🏻मुख्य संपादक – संदिप बारटक्के
