वृत्तवेध मarathi / संदिप बारटक्के
दौंड | शिक्षणाबरोबरच सामाजिक जबाबदारीची जाणीव विद्यार्थ्यांमध्ये रुजविण्याचे कार्य करणारे संस्कार प्रायमरी ॲड हायस्कूल दौंड हि संस्था विविध समाजोपयोगी उपक्रमांमुळे परिसरात वेगळी ओळख निर्माण करत आहे. याच सामाजिक बांधिलकीच्या भावनेतून शाळेचे संस्थापक जयंत पवार यांच्या पुढाकारातून दौंड येथील स्मशानभूमीस आवश्यक साहित्याचे वाटप करण्यात आले.
समाजातील प्रत्येक घटकापर्यंत मदतीचा हात पोहोचावा तसेच सार्वजनिक ठिकाणांच्या सुविधांमध्ये वाढ व्हावी, या उद्देशाने जयंत पवार सातत्याने विविध सामाजिक उपक्रम राबवत असतात. त्यांच्या संकल्पनेतून आणि संस्कार स्कूलच्या सामाजिक उत्तरदायित्वाच्या भावनेतून हा उपक्रम साकारण्यात आला.
या कार्यक्रमास अमरधाम स्वच्छता समितीचे विश्वस्त सचिन कुलथे, निखिल स्वामी, मोहन नारंग, संदिप बोराडे, संस्कार स्कूलच्या मुख्याध्यापिका सुनिता मिनिगी तसेच दौंड नगरपालिकेचे स्वच्छता कर्मचारी उपस्थित होते.
स्मशानभूमीत येणाऱ्या नागरिकांना आवश्यक सुविधा उपलब्ध व्हाव्यात व परिसर अधिक स्वच्छ, सुरक्षित आणि सुसज्ज राहावा यासाठी फावडे, पाण्याच्या बादल्या, झाडू, सुपल्या, कचराकुंडी, लोखंडी बाके तसेच इतर उपयुक्त साहित्य प्रदान करण्यात आले. या साहित्यामुळे अंत्यविधीच्या वेळी नागरिकांना होणारा त्रास कमी होण्यास मदत होणार असून स्मशानभूमीच्या देखभालीलाही हातभार लागणार आहे.
यावेळी उपस्थित मान्यवरांनी संस्कार स्कूलच्या या समाजहित उपक्रमाचे तसेच संस्थापक जयंत पवार यांच्या सामाजिक जाणिवेचे विशेष कौतुक केले. शिक्षणासोबतच सामाजिक मूल्यांची जोपासना करणाऱ्या अशा उपक्रमांमुळे विद्यार्थ्यांमध्ये समाजसेवेची प्रेरणा निर्माण होते, असे मतही यावेळी व्यक्त करण्यात आले.
संस्कार स्कूलने केवळ शैक्षणिक क्षेत्रातच नव्हे तर सामाजिक क्षेत्रातही आपला ठसा उमटविला आहे. जयंत पवार यांच्या नेतृत्वाखाली राबविण्यात येणारे विविध समाजोपयोगी उपक्रम समाजासाठी प्रेरणादायी ठरत असून या उपक्रमाचे नागरिकांकडून मोठ्या प्रमाणात स्वागत होत आहे. सामाजिक बांधिलकीचा आदर्श जपत समाजोपयोगी कार्य करणाऱ्या संस्कार स्कूलवर सर्व स्तरांतून कौतुकाचा वर्षाव होत आहे.
✍🏻मुख्य संपादक – संदिप बारटक्के
