✍️ संदिप बारटक्के
दौंड : दौंड शहरातील सार्वजनिक मुतारीचा प्रश्न दिवसेंदिवस गंभीर होत असून, शहरातील नागरिक, व्यापारी तसेच महिलांना मोठ्या गैरसोयीला सामोरे जावे लागत आहे. दौंड नगरपालिका हद्दीतील जुन्या सार्वजनिक मुताऱ्या तोडून टाकण्यात आल्यानंतर त्यांच्या जागी नवीन मुतारी उभारण्याचे काम मंजूर करण्यात आले. मात्र, नव्या मुतारीचे बांधकाम गेल्या अनेक दिवसांपासून अपूर्ण अवस्थेत पडून असल्याने शहरातील नागरिकांकडून तीव्र नाराजी व्यक्त होत आहे.
नवीन मुतारीच्या बांधकामाला सुरुवातीला काही दिवस सुरुवात करण्यात आली. मात्र, त्यानंतर ठेकेदाराने अचानक काम बंद केल्याचे नागरिकांचे म्हणणे आहे. सध्या बांधकाम अर्धवट अवस्थेत असून, परिसरात नागरिकांची मोठी गैरसोय होत आहे. विशेषतः बाजारपेठेत येणाऱ्या महिला, ज्येष्ठ नागरिक, व्यापारी आणि बाहेरून शहरात येणाऱ्या नागरिकांना सार्वजनिक स्वच्छतागृहाअभावी अडचणींचा सामना करावा लागत आहे.
दरम्यान, सुरू असलेल्या बांधकामाच्या गुणवत्तेबाबतही नागरिकांनी गंभीर प्रश्न उपस्थित केले आहेत. बांधकामासाठी वापरण्यात आलेल्या साहित्याची गुणवत्ता तसेच पायाभूत कामाबाबत योग्य ती काळजी घेतली जात नसल्याचा आरोप नागरिकांकडून करण्यात आला आहे. बांधकामाच्या पायाभूत भागाला आवश्यक तेवढे पाणी न मारल्याचेही नागरिकांचे म्हणणे आहे. त्यामुळे भविष्यात हे बांधकाम टिकाऊ राहील का, असा सवाल उपस्थित होत आहे.
कामातील अनियमितता, बांधकामाची गुणवत्ता आणि संथ गती याबाबत संबंधित विभागाने पाहणी करून वस्तुस्थिती स्पष्ट करावी, अशी मागणी नागरिकांकडून होत आहे. तसेच काम वेळेत पूर्ण का झाले नाही आणि अपूर्ण कामाबाबत नगरपालिका प्रशासनाने आतापर्यंत कोणती कारवाई केली, असे प्रश्नही उपस्थित होत आहेत.
‘दौंडकरांना पुन्हा मुतारी बांधून देतो का कोणी?’ असा संतप्त सवाल
शहरातील जुन्या सार्वजनिक मुताऱ्या पाडण्यात आल्या, मात्र त्यांच्या पर्यायी सुविधा अद्याप नागरिकांना उपलब्ध झालेल्या नाहीत. त्यामुळे आधीची सुविधा काढून घेण्यापूर्वी नवीन सुविधा तयार करण्याचे नियोजन का करण्यात आले नाही, असा सवाल नागरिक उपस्थित करत आहेत.
सार्वजनिक स्वच्छतागृह ही नागरिकांची मूलभूत गरज असून, त्याकडे दुर्लक्ष करणे योग्य नाही. नगरपालिका प्रशासनाने तातडीने अपूर्ण बांधकामाची पाहणी करून कामातील त्रुटी दूर कराव्यात, निकृष्ट काम आढळल्यास संबंधित ठेकेदारावर कारवाई करावी आणि नवीन मुतारीचे बांधकाम तातडीने पूर्ण करून नागरिकांसाठी खुले करावे, अशी मागणी जोर धरत आहे.
एकीकडे स्वच्छ शहराचा दावा केला जात असताना दुसरीकडे सार्वजनिक मुतारीचे बांधकाम महिनोनमहिने रखडत असेल तर नागरिकांनी सुविधा मिळवायची तरी कुठे? ‘दौंडकरांना पुन्हा मुतारी बांधून देतो का कोणी?’ असा संतप्त सवाल आता नागरिकांकडून उपस्थित केला जात आहे.
✍🏻मुख्य संपादक – संदिप बारटक्के
