वृत्तवेध मarathi / संदिप बारटक्के
पाटस — एम.आर.एन. भीमा शुगर अँड पॉवर प्रा. लि. (निराणी शुगर्स लि.), पाटस, ता. दौंड या कारखान्याच्या गाळप हंगाम २०२५–२६ साठी प्रति टन ऊसाला ₹३१००/- पहिला हप्ता देण्यात आलेला आहे.
आता दिनांक १६ जानेवारीनंतर गाळपास येणाऱ्या उसाला प्रति टन ₹२००/- अतिरिक्त अनुदान देण्यात येणार असून, त्यामुळे ऊस दर ₹३३००/- प्रति टन होणार असल्याची माहिती कारखान्याचे अध्यक्ष आमदार ॲड. राहुल कुल यांनी दिली.
हंगाम २०२५–२६ साठी आलेल्या उसाचा अंतिम दर दौंड तालुक्यातील इतर साखर कारखान्यांच्या बरोबरीने देण्यात येईल, असे आश्वासनही आमदार राहुल कुल यांनी दिले.
कारखान्याने दि. १२ जानेवारीपर्यंत ५,४०,८४८ मे.टन ऊस गाळप केले असून, ५,३१,०५० क्विंटल साखर उत्पादन करण्यात आले आहे. कारखान्याचा सरासरी साखर उतारा ११.३४ टक्के इतका आहे.
डिस्टिलरी प्रकल्पातून आतापर्यंत ८,८८,४८६३ लिटर उच्च प्रतीचे इथेनॉल तसेच २६,७७,३२१ लिटर रिक्टिफाईड स्पिरिट उत्पादन करण्यात आले आहे.
सहवीज निर्मिती प्रकल्पातून २,१७,५९,५३७ युनिट्स वीज निर्मिती झाली असून, त्यापैकी १,६७,५८,२३७ युनिट्स स्ववापर करून ५१,८२,२०० युनिट्स वीज निर्यात करण्यात आली आहे.
यावर्षी कारखान्याच्या इतिहासात प्रथमच एका दिवसात ११,००० मे.टन ऊस गाळपाचा विक्रम करण्यात आल्याची माहिती कारखान्याचे कार्यकारी संचालक रविकांत पाटील यांनी दिली. तसेच, सभासद शेतकऱ्यांनी आपल्या हक्काच्या कारखान्याला जास्तीत जास्त ऊस पुरवठा करून सहकार्य करावे, असे आवाहन त्यांनी केले.
कारखान्याला ऊस पुरवठा करणाऱ्या शेतकऱ्यांचे, तसेच कारखान्यातील अधिकारी, कर्मचारी व युनियन पदाधिकाऱ्यांचे निराणी ग्रुपचे अध्यक्ष श्री. मुरुगेश निराणी, एक्झिक्युटीव्ह डायरेक्टर श्री. संगमेश निराणी, कार्यकारी संचालक श्री. विजय निराणी व संचालक श्री. विशाल निराणी यांनी आभार मानले.
✍🏻मुख्य संपादक – संदिप बारटक्के
