✍️अख्तर काझी
दौंड: शहरातील बंगला साईड( डिफेन्स कॉलनी) परिसरात एका विवाहित महिलेला निर्जन ठिकाणी नेऊन तिच्यावर चाकूने वार करीत जीवे मारण्याचा प्रयत्न झाल्याची घटना घडली. महिलेच्या गळ्यावर चाकूचा वार झाल्याने ती गंभीर जखमी झाली आहे. पीडित महिलेच्या फिर्यादीवरून दौंड पोलिसांनी महिलेचा पती विशाल प्रकाश जाधव(रा. गोवा गल्ली,दौंड) व ऋषी अशोक डोके(रा. वडारपूर,जि. मुर्तीजापुर) यांच्या विरोधात भारतीय न्याय संहिता 2023 कलम 3(5),109(1) प्रमाणे गुन्हा दाखल केला आहे.
पोलिसांनी दिलेल्या फिर्यादीनुसार, सदरची घटना बुधवार दिनांक 19 ऑगस्ट रोजी रात्री 8.30 वा. च्या दरम्यान येथील डिफेन्स कॉलनी परिसरात घडली. पीडिता आपली मैत्रीण व मुलांसोबत दुचाकीवरून( स्कुटी) शहरात जात होती. पती विशाल जाधव व त्याच्या मित्राने त्यांचा पाठलाग केला. याच परिसरातील एका हॉटेल समोर त्यांनी महिलेला बोलायचे आहे असे सांगून तिची स्कुटी थांबविली. व तीला जवळच असलेल्या मोकळ्या जागेत नेले. यावेळी ऋषी डोके याने महिलेला पकडून तिच्या तोंडाला रुमाल लावण्याचा प्रयत्न केला. महिलेने प्रतिकार केला असता विशाल जाधव याने आपल्याकडील चाकू काढून जीवे मारण्याची धमकी दिली. याच दरम्यान त्याने महिलेच्या गळ्यावर चाकू फिरविल्याने मोठा रक्तस्त्राव होऊन ती गंभीर जखमी झाली. आपल्यावर झालेल्या हल्ल्यानंतर तिने आरडाओरडा केला, महिलेचा आवाज ऐकून जवळच बसलेले तरुण तिच्या मदतीसाठी धावले. योगायोगाने याचवेळी रस्त्यावरून दुचाकी वर पोलीस येताना दिसल्याने तिने पोलिसांना थांबवून मदतीसाठी विनंती केली. पोलिसांना पाहताच हल्लेखोर दुचाकीवरून प्रसार झाले असल्याचे महिलेने सांगितले आहे. घटनेचा पुढील तपास दौंड पोलीस स्टेशनचे सहाय्यक पोलीस निरीक्षक सपाटे करीत आहेत.
✍🏻मुख्य संपादक – संदिप बारटक्के
