✍️अख्तर काझी
दौंड: पुणे ग्रामीण जिल्हास्तरीय कॅरम स्पर्धेत येथील पोदार इंटरनॅशनल स्कूल मध्ये इयत्ता सातवी मध्ये शिक्षण घेत असलेला विद्यार्थी रुद्र अभिजीत बंदिष्टी याने विजेतेपदाचा मान पटकाविला आहे. या विजेतेपदामुळे रुद्रची राज्यस्तरीय कॅरम स्पर्धेसाठी निवड झाली आहे.
पुणे शालेय शिक्षण क्रीडा विभाग, क्रीडा व युवक सेवा संचालनालय( महाराष्ट्र राज्य) अंतर्गत जिल्हा क्रीडा परिषद व जिल्हा क्रीडा अधिकारी कार्यालय पुणे, जुन्नर तालुका क्रीडा शिक्षण संघटना आणि समर्थ सरल एज्युकेशनल इन्स्टिट्यूट संचलित समर्थ ज्युनिअर कॉलेज( बांगरवाडी) यांच्या संयुक्त विद्यमाने पुणे ग्रामीण जिल्हास्तरीय कॅरम स्पर्धा(2026-27) उत्साहात पार पडली. सदरची स्पर्धा समर्थ टेक्निकल(बेल्हे, ता. जुन्नर, जिल्हा पुणे) सेमिनार हॉल येथे आयोजित करण्यात आली होती. स्पर्धेमध्ये 14, 17 आणि 19 वर्षाखालील वयोगटातील विद्यार्थ्यांनी उत्स्फूर्तपणे सहभाग नोंदविला. स्पर्धेत आपल्या उत्कृष्ट खेळाचे प्रदर्शन दाखवीत रुद्र अभिजीत बंदिष्टी याने विजेतेपद मिळवून सुवर्णपदकावर आपले नाव कोरले. त्याच्या या यशामुळे त्याची राज्यस्तरीय कॅरम स्पर्धेसाठी निवड झाली आहे. उद्योजक अभिजीत बंदिष्टी,ऍड.विजय बंदिष्टी व प्रा. स्वाती कणसे यांचे रुद्र यास मोलाचे मार्गदर्शन लाभले. रुद्र यास राज्यस्तरीय स्पर्धेसाठी शुभेच्छा दिल्या जात आहेत.
✍🏻मुख्य संपादक – संदिप बारटक्के
