वृत्तवेध मarathi / संदिप बारटक्के
राज्यातील शाळकरी मुलांच्या आरोग्याच्या संरक्षणासाठी शाळा व महाविद्यालय परिसरात विकल्या जाणाऱ्या घातक शीतपेये, कटिंग पान आणि दुधातील भेसळ रोखण्यासाठी राज्य सरकार विशेष मोहीम राबविणार असल्याची घोषणा अन्न व औषध प्रशासन मंत्री यांनी विधानसभेत केली. आमदार राहुल कुल यांनी प्रश्नोत्तराच्या तासात उपस्थित केलेल्या प्रश्नाला उत्तर देताना ही माहिती देण्यात आली.
आमदार राहुल कुल यांनी सभागृहात शाळांच्या परिसरात विकल्या जाणाऱ्या ‘स्टिंग’सारख्या एनर्जी ड्रिंक्स, आरोग्यास अपायकारक कटिंग पान आणि विविध फ्लेव्हर्ड मिल्कच्या वाढत्या विक्रीबाबत गंभीर चिंता व्यक्त केली. काही ठिकाणी या उत्पादनांमध्ये कृत्रिम रंग, अतिरिक्त साखर आणि अंमली पदार्थांचा वापर होत असल्याच्या तक्रारी असल्याचे त्यांनी सांगितले. त्यामुळे अशा उत्पादनांवर तातडीने नियंत्रण आणण्यासाठी तज्ज्ञ समिती नेमून राज्यव्यापी मोहीम राबविण्याची मागणी त्यांनी केली.
याचबरोबर राज्यातील दुधातील भेसळ हा गंभीर प्रश्न असल्याचे नमूद करत, बहुतांश मिल्क कलेक्शन सेंटर्सवर तपासणी सुविधा नसल्याकडे त्यांनी सरकारचे लक्ष वेधले. अन्न नमुन्यांमध्ये सदोष आढळणाऱ्या कंपन्यांचे संबंधित बॅच बाजारातून तात्काळ मागे घेऊन त्यांच्यावर कठोर कारवाई करण्याची मागणीही त्यांनी केली.
यावर उत्तर देताना अन्न व औषध प्रशासन मंत्री नरहरी झिरवळ यांनी सांगितले की, राज्यात सध्या मुंबई, छत्रपती संभाजीनगर आणि नागपूर येथे अत्याधुनिक अन्न चाचणी प्रयोगशाळा कार्यरत आहेत. तसेच पुणे, नाशिक, रायगड आणि यवतमाळ येथे नवीन प्रयोगशाळा सुरू करण्याची प्रक्रिया अंतिम टप्प्यात असून सार्वजनिक-खाजगी भागीदारी (PPP) तत्त्वावर आणखी २२ प्रयोगशाळा उभारण्यात येणार आहेत.
मंत्र्यांनी पुढे सांगितले की, पूर्वी अन्न नमुन्यांचा अहवाल येण्यासाठी सुमारे तीन महिने लागत होते. मात्र, नवीन कार्यपद्धतीमुळे आता एका महिन्याच्या आत अहवाल उपलब्ध होत असून पुढील महिन्यापासून हा कालावधी आणखी कमी करण्यात येणार आहे. सदोष आढळणाऱ्या कंपन्यांची नावे सभागृहाच्या पटलावर ठेवून त्यांच्यावर कठोर कारवाई केली जाईल, असेही त्यांनी स्पष्ट केले.
यावेळी आमदार राहुल कुल यांनी मतदारसंघातील तसेच राज्यातील बालकांचे आरोग्य सुरक्षित ठेवण्यासाठी आणि नागरिकांना निर्भेळ अन्न व दूध उपलब्ध करून देण्यासाठी आपला पाठपुरावा यापुढेही कायम राहील, असा विश्वास व्यक्त केला.
✍🏻मुख्य संपादक – संदिप बारटक्के
