✍️ संदिप बारटक्के
दौंड : दिव्यांग बांधवांना स्वावलंबी बनविण्यासाठी स्कुटी अथवा मोटारसायकल उपलब्ध करून देण्याची योजना सुरू करावी, तसेच ४० टक्क्यांपेक्षा अधिक दिव्यांगत्व असलेल्या बांधवांना अनुदानाचा लाभ मिळावा, या प्रमुख मागण्यांसाठी राष्ट्रवादी काँग्रेस पार्टी दिव्यांग सेलच्या पदाधिकाऱ्यांनी पुणे जिल्हा परिषद अध्यक्ष वीरधवल जगदाळे-पाटील यांची भेट घेऊन निवेदन दिले.
दौंड शुगर येथे झालेल्या या भेटीदरम्यान दिव्यांग बांधवांच्या विविध प्रलंबित प्रश्नांवर सविस्तर चर्चा करण्यात आली. दिव्यांग व्यक्तींना दैनंदिन प्रवास, रोजगार आणि स्वयंरोजगारासाठी मोठ्या अडचणींचा सामना करावा लागतो. त्यामुळे त्यांना स्कुटी किंवा मोटारसायकल देण्यासाठी विशेष योजना सुरू करून त्यासाठी आवश्यक अनुदान उपलब्ध करून द्यावे, अशी मागणी करण्यात आली. तसेच सध्या असलेल्या निकषांमध्ये ४० टक्क्यांपेक्षा अधिक दिव्यांगत्व असलेल्या लाभार्थ्यांनाही अनुदानाचा लाभ मिळावा, अशी मागणी पदाधिकाऱ्यांनी केली.
यासोबतच गेल्या दोन वर्षांपासून प्रलंबित असलेल्या रमाई आवास योजनेच्या कामांना तातडीने निधी उपलब्ध करून द्यावा, अशी मागणीही निवेदनाद्वारे करण्यात आली. निधीअभावी अनेक पात्र लाभार्थ्यांची घरकुलांची कामे रखडली असून, संबंधित कुटुंबांना मोठ्या अडचणींचा सामना करावा लागत आहे. त्यामुळे प्रलंबित घरकुलांना निधी देऊन ही कामे लवकरात लवकर पूर्ण करण्याची मागणी करण्यात आली.
यावेळी राष्ट्रवादी काँग्रेस पार्टी दिव्यांग सेल प्रदेश उपाध्यक्ष मिलिंद साळवे, विजय थोरात, शहाजी भदरगे, अशोक कांबळे,सूर्यकांत गायकवाड, रामभाऊ महाडिक आदी मान्यवर उपस्थित होते.
दिव्यांग बांधवांच्या प्रश्नांकडे प्रशासनाने सकारात्मक दृष्टिकोनातून पाहून या मागण्यांवर तातडीने कार्यवाही करावी, अशी अपेक्षा यावेळी पदाधिकाऱ्यांनी व्यक्त केली.
✍🏻मुख्य संपादक – संदिप बारटक्के
