✍️ संदिप बारटक्के
पुणे : क्रांतिसूर्य महात्मा फुले यांच्या द्विजन्मशताब्दी वर्षानिमित्त संयुक्त महाराष्ट्र पत्रकार महासंघ, मुंबई यांच्या वतीने News18 चे प्रतिनिधी पत्रकार सुमित सोनवणे यांचा विशेष सन्मान करण्यात आला. पुणे येथील गांधी भवन येथे आयोजित कार्यक्रमात त्यांच्या निर्भीड आणि सामाजिक बांधिलकी जपणाऱ्या पत्रकारितेची दखल घेत हा सन्मान करण्यात आला.
या कार्यक्रमात बीबीसी मराठीचे संपादक अभिजित कांबळे आणि ‘द वायर’चे पत्रकार मोहम्मद इरफान यांच्या हस्ते पत्रकार सुमित सोनवणे यांना महात्मा फुले यांचे वाङ्मय व पुस्तके प्रदान करण्यात आली. महात्मा फुले यांच्या विचारांचा आणि सामाजिक परिवर्तनाच्या कार्याचा वारसा पुढे नेणाऱ्या पत्रकारितेला प्रोत्साहन देण्याच्या उद्देशाने हा विशेष सन्मान करण्यात आला.
पत्रकार सुमित सोनवणे हे गेल्या दहा वर्षांपासून ग्रामीण तसेच शहरी भागातील विविध सामाजिक प्रश्नांवर सातत्याने पत्रकारिता करत आहेत. शेतकरी, वंचित व दुर्बल घटकांचे प्रश्न, नागरिकांच्या समस्या तसेच प्रशासनातील त्रुटी यांना त्यांनी आपल्या वृत्तांकनातून सातत्याने वाचा फोडली आहे. कोणत्याही दबावाला बळी न पडता वस्तुस्थिती मांडण्याची भूमिका त्यांनी आपल्या पत्रकारितेतून जपली आहे.
सामान्य नागरिकांच्या प्रश्नांना माध्यमांमध्ये स्थान मिळवून देणे, प्रशासनाच्या कारभारातील त्रुटी समोर आणणे आणि सामाजिक प्रश्नांकडे गांभीर्याने पाहण्यास भाग पाडणे, या भूमिकेमुळे सोनवणे यांच्या पत्रकारितेची वेगळी ओळख निर्माण झाली आहे. त्यांच्या याच निर्भीड, परखड आणि सामाजिक बांधिलकीच्या पत्रकारितेची दखल घेत संयुक्त महाराष्ट्र पत्रकार महासंघाच्या वतीने त्यांचा गौरव करण्यात आला.
यावेळी सन्मान स्वीकारताना पत्रकार सुमित सोनवणे यांनी महात्मा फुले यांचे वाङ्मय आणि पुस्तके मिळणे हा आपल्यासाठी अभिमानाचा तसेच प्रेरणादायी क्षण असल्याची भावना व्यक्त केली. महात्मा फुले यांनी समाजातील विषमता, अज्ञान आणि अन्यायाविरुद्ध उभे राहून केलेले कार्य पत्रकारितेसाठीही प्रेरणादायी आहे. त्यांच्या विचारांचा अभ्यास करताना पुढील वाटचालीत सत्य, निर्भीडपणा आणि सामाजिक बांधिलकी जपत पत्रकारिता करण्याची नवी प्रेरणा मिळाली, असे सोनवणे यांनी सांगितले.
दौंडचे सुपुत्र पत्रकार सुमित सोनवणे यांच्या पुढील पत्रकारितेच्या वाटचालीला वृत्तवेध मarathi कडून मनःपूर्वक शुभेच्छा,,,
✍🏻मुख्य संपादक – संदिप बारटक्के
