वृत्तवेध मarathi / संदिप बारटक्के
दौंड : दौंड पोलीस स्टेशनमध्ये गु.रजि. नं. 298/2026 अन्वये बी.एन.एस. कलम 108, 351(2), 352, 3(5) अंतर्गत १३ जणांविरोधात गंभीर स्वरूपाचा गुन्हा दाखल करण्यात आला आहे. या प्रकरणामुळे दौंड शहरात मोठी खळबळ उडाली आहे.
याबाबत दौंड पोलिसांकडून मिळालेल्या माहितीनुसार, फिर्यादी अव्दैत विवेक गटणे (वय 37, व्यवसाय – खाजगी नोकरी, मूळ रा. महादेव गल्ली, दौंड, हल्ली रा. क्विन्स टाउन, चिंचवड रेल्वे स्टेशन समोर, चिंचवड, पुणे) यांनी दौंड पोलीस ठाण्यात फिर्याद दिली आहे.
फिर्यादीनुसार, फिर्यादी यांचे वडील विवेक शंकर गटणे (वय 72) यांना आरोपींनी “फायनान्स कंपनीत ओळखीचे कर्मचारी” असल्याचे सांगून विश्वासात घेतले. मागील एक वर्षाच्या कालावधीत आरोपींनी वेळोवेळी त्यांच्याकडून पैसे, सोने व इतर मौल्यवान वस्तू घेतल्या. मात्र, त्या परत न करता त्यांची फसवणूक केल्याचा आरोप करण्यात आला आहे.
तसेच, दिलेले पैसे व वस्तू परत मागितल्यावर आरोपींकडून टाळाटाळ करण्यात आली. यामुळे विवेक गटणे यांना आर्थिक, मानसिक व शारीरिक त्रास सहन करावा लागला. या सततच्या त्रासातून त्यांना आत्महत्या करण्यास प्रवृत्त करण्यात आल्याचा आरोप फिर्यादीने केला आहे.
विशेष म्हणजे, मयत विवेक गटणे यांनी मृत्यूपूर्वी आरोपींची नावे एका वहीत लिहून ठेवल्याचेही फिर्यादीत नमूद करण्यात आले आहे. त्या आधारे आरोपी क्र. 1 ते 13 विरुद्ध कायदेशीर कारवाईची मागणी करण्यात आली आहे.
या प्रकरणातील आरोपींमध्ये संजय भिमराव बारवकर, अरीफ शमशुद्दीन शेख, प्रकाश आबाजी भालेराव, अख्तर अहमद शेख, आदित्य सुधीर जगताप, शंकर रमेश वाघमारे, नगरसेवक राजू भीमराव बारवकर तसेच शितोळे, सोनवणे, चोप्रा, कुलकर्णी (मॅडम), शिंदे व मुल्ला (मुंबई) यांचा समावेश आहे. काही आरोपींची पूर्ण नावे अद्याप स्पष्ट झालेली नाहीत.
सदर गुन्ह्याची नोंद पोलीस हवालदार सय्यद (पो.हवा. 508) यांनी केली असून, पुढील तपास सहाय्यक पोलीस निरीक्षक रूपेश कदम करीत आहेत.
✍🏻मुख्य संपादक – संदिप बारटक्के
