✍️ अख्तर काझी
दौंड: जगाला शांतीचा संदेश देणारे प्रेषित हजरत मो. पैगंबर यांची जयंती शहरात मोठ्या उत्साहात साजरी करण्यात आली. सालाबाद प्रमाणे समस्त मुस्लिम समाज व शाही आलमगीर मशीदीच्या वतीने जयंती उत्सवाचे आयोजन करण्यात आले. परंपरेप्रमाणे जयंती निमित्ताने आयोजकांच्या वतीने जुलुस( मिरवणूक) चे आयोजन करण्यात आले होते. येथील आलमगीर मशीद येथून जुलुसला प्रारंभ झाला. मोठ्या संख्येने मुस्लिम बांधव तसेच बच्चे कंपनी पारंपारिक वेशभुषेत उंट, घोड्यावर स्वार होत जुलूस मध्ये सहभागी झाले होते. फटाक्यांच्या आतिषबाजीत व पैगंबरांच्या जयघोषात जुलुस शहरातील प्रमुख चौकातून मार्गस्थ होत असताना येथील विविध पक्ष, संघटनांच्या वतीने जुलूस चे स्वागत करण्यात आले, मुस्लिम बांधवांना जयंतीच्या शुभेच्छा देण्यात आल्या. तसेच जुलूस मध्ये सहभागी मुस्लिम बांधवांना मिठाई ,आईस्क्रीमचे वाटप करण्यात आले.
आमदार राहुल कुल, पुणे जिल्हा परिषद अध्यक्ष वीरधवल जगदाळे, नगराध्यक्ष दुर्गादेवी जगदाळे,मा. नगराध्यक्ष प्रेमसुख कटारिया, इंद्रजीत जगदाळे ,योगेश कटारिया, जिल्हा परिषद सदस्य तुषार थोरात तसेच नगरसेवक, पक्षांच्या पदाधिकाऱ्यांनी मुस्लिम बांधवांची भेट घेत त्यांना जयंतीच्या शुभेच्छा दिल्या.
शाही आलमगीर मशीद येथे जुलुसची सांगता करण्यात आली. यावेळी मशिदीचे मौलाना अस्लम रझा यांनी मो. पैगंबर यांच्या विचारांना उजाळा दिला, पैगंबर जयंती चे महत्व पटवून दिले. प्रत्येक मुस्लिम बांधवांनी पैगंबरांच्या विचारांचे आचरण करून त्यांची जीवनामध्ये अंमलबजावणी करावी असे आवाहन केले. तसेच आपल्या भारतासह सर्वत्रच शांतता नांदावी, भाईचारा वाढावा अशी अल्लाह कडे प्रार्थना केली.
पोलीस प्रशासनाच्या चोख बंदोबस्तामुळे जयंती उत्सव शांततेत व उत्साहात पार पडला.
✍🏻मुख्य संपादक – संदिप बारटक्के
