✍️ अख्तर काझी
दौंड: शहरातील उड्डाण पुलाजवळ एका दुचाकी ला पाठीमागून येणाऱ्या हायवा ट्रकने जोरदार धडक दिल्याने झालेल्या अपघातात दुचाकी वरील तरुणी रस्त्यावर फेकली जाऊन गंभीर जखमी झाल्याची घटना घडली.
अपघाता नंतर ट्रक चालक जखमी तरुणीला कोणतीही मदत न करता आपल्या वाहनासह तेथून फरार झाला. राजेंद्रनाथ धेंडे यांच्या फिर्यादीवरून अज्ञात वाहन चालकावर गुन्हा दाखल करण्यात आला .मात्र दौंड पोलिसांनी कसून शोध घेत तीन दिवसातच तो हायवा ट्रक अखेर शोधून आणलाच व चालका विरोधात गुन्हा दाखल करीत त्याला अटक केली.
पोलिसांनी दिलेल्या माहितीनुसार, सदरची घटना दिनांक 7जुलै रोजी सायंकाळी 6 वा. दरम्यान शहरातील उड्डाण पुलाजवळ घडली. सारिका अशोक कंकाळे ही तरुणी आपल्या दुचाकीवरून घरी जात असताना येथील उड्डाणपूल परिसरात पाठीमागून आलेल्या हायवा ट्रकने तिच्या दुचाकीला जोरदार धडक दिली. या अपघातात सारिका रस्त्यावर फेकली गेल्याने तिच्या डोक्याला मार लागून गंभीर जखमी झाली. अपघातानंतर चालक हायवा ट्रक घेऊन फरार झाला. घटनास्थळावर उपस्थित असलेल्या स्थानिकांना सारिका चा मोबाईल सापडला. त्यापैकी एकाने मोबाईल वरून तिच्या घरच्यांना अपघाताची माहिती दिली व सारिका गंभीर जखमी झाल्याचे सांगितले. जखमी सारिकाला उपचारासाठी येथील खाजगी दवाखान्यात दाखल करण्यात आले. परंतु तिच्या मेंदूला गंभीर दुखापत झाल्याने तिची प्रकृती खालावली. त्यामुळे तिला पुणे येथील खाजगी दवाखान्यात दाखल केले. परंतु मृत्यूशी झुंजताना अखेर दिनांक 9 जुलै रोजी तिचा मृत्यू झाला.
सारिकाच्या मृत्यूची बातमी कळताच ,घटनेचे गांभीर्य ओळखून दौंड पोलिसांनी तो हायवा ट्रक शोधण्यासाठी आपल्या तपासाची चक्रे फिरविण्यास सुरुवात केली. या मार्गावरील व परिसरातील सीसीटीव्ही फुटेज तपासून त्या आधारे या मार्गावरून गेलेल्या अनेक वाहनांची माहिती घेतली. पोलिसांनी दोन-तीन दिवस या हायवा ट्रकचा कसून शोध घेतला असता सदरचा ट्रक काष्टी येथील दालमिया सिमेंट प्रोजेक्ट येथील असल्याचे निष्पन्न झाले. अपघातास व तरुणीच्या मृत्यू कारणीभूत ठरलेल्या हायवा ट्रक सह चालकास दौंड पोलिसांनी ताब्यात घेतले. चालक कृष्णा देवभान रजक(रा. मध्य प्रदेश) याच्या विरोधात गुन्हा दाखल करीत त्यास अटक करण्यात आली. दौंड पोलिसांनी, सारिकाच्या मृत्यूस कारणीभूत ठरलेला अपघातातील ट्रक शोधल्याने तिच्या कुटुंबीयांना आर्थिक भरपाई मिळण्यास नक्कीच मदत होणार असल्याचे पोलिसांनी सांगितले.
सदरची कारवाई, पोलीस निरीक्षक हेमंत शेडगे यांच्या मार्गदर्शनाखाली पोलीस उपनिरीक्षक अब्दुल बिद्री, पोलीस हवालदार अमीर शेख, पोलीस कॉन्स्टेबल पवन माने व गोरख हजारे या पथकाने केली.
✍🏻मुख्य संपादक – संदिप बारटक्के
