वृत्तवेध मarathi / संदिप बारटक्के
दौंड : दौंड पोलीस स्टेशन हद्दीतील कायदा व सुव्यवस्था अबाधित राखण्यासाठी तसेच नागरिकांना सुरक्षित वातावरण उपलब्ध करून देण्याच्या उद्देशाने दौंड पोलिसांनी सराईत गुन्हेगारांविरुद्ध कठोर प्रतिबंधात्मक कारवाई केली आहे. या कारवाईअंतर्गत दोन सराईत आरोपींना पुढील एक वर्षासाठी तडीपार करण्यात आले आहे.
पोलीसांनी दिलेल्या माहितीनुसार, अमोल शंकर विटकर (रा. बोरावकेनगर, ता. दौंड, जि. पुणे) याच्याविरुद्ध शरीराविरुद्धचे गुन्हे, नागरिकांमध्ये भीती व दहशत निर्माण करणे, दमदाटी करून जीवे मारण्याच्या धमक्या देणे तसेच मानवी जीवितास धोका निर्माण करणारे गंभीर स्वरूपाचे गुन्हे दाखल आहेत. त्याच्याविरुद्ध सन २०२३ ते २०२५ या कालावधीत दौंड पोलीस स्टेशनमध्ये विविध गंभीर गुन्ह्यांची नोंद करण्यात आलेली आहे.
तसेच असीम कासिम उर्फ असिफ कासम कुरेशी (रा. खाटीक गल्ली, दौंड, जि. पुणे) याच्याविरुद्ध शरीराविरुद्धचे गुन्हे, गोवंश जातीच्या जनावरांची बेकायदेशीर कत्तल, गोवंश जनावरे कत्तलीच्या उद्देशाने डांबून ठेवणे तसेच नागरिकांच्या धार्मिक भावना दुखावण्यासारख्या गंभीर स्वरूपाच्या गुन्ह्यांची नोंद आहे. त्याच्याविरुद्धही दौंड पोलीस स्टेशनमध्ये अनेक गुन्हे दाखल आहेत.
दोन्ही आरोपींच्या गुन्हेगारी कृत्यांमुळे परिसरात भीतीचे वातावरण निर्माण होत असून कायदा व सुव्यवस्थेला धोका निर्माण होत असल्याचे पोलीस तपासात निदर्शनास आले. त्यानुसार महाराष्ट्र पोलीस अधिनियम कलम ५६ (१) (अ) व (ब) अन्वये दोन्ही आरोपींविरुद्ध तडीपार कारवाईचा प्रस्ताव मा. उपविभागीय दंडाधिकारी, दौंड यांच्याकडे सादर करण्यात आला होता.
सदर प्रस्तावावर सुनावणी झाल्यानंतर मा. उपविभागीय दंडाधिकारी रेवनाथ लबडे यांनी आरोपी अमोल शंकर विटकर व असीम कासिम उर्फ असिफ कासम कुरेशी यांना पुणे पोलीस आयुक्तालय व महानगरपालिका हद्दीसह पुणे, सोलापूर, सातारा आणि अहिल्यानगर जिल्ह्यांच्या हद्दीतून पुढील एक वर्ष कालावधीसाठी तडीपार करण्याचा आदेश दिला आहे.
पोलीसांनी दोन्ही आरोपींना तडीपार आदेशाची विधिवत बजावणी केली असून संबंधित जिल्ह्यांच्या हद्दीबाहेर रवाना करण्याची कार्यवाही पूर्ण करण्यात आली आहे.
गुन्हेगारी प्रवृत्तींना आळा घालण्यासाठी व नागरिकांच्या सुरक्षिततेसाठी अशा प्रकारच्या प्रतिबंधात्मक कारवाया यापुढेही प्रभावीपणे सुरू राहणार असल्याचे दौंड पोलिसांकडून सांगण्यात आले.
✍🏻मुख्य संपादक – संदिप बारटक्के
