✍️संदिप बारटक्के
मुंबई | दौंड तालुक्याच्या राजकारणात महत्त्वाची घडामोड घडली असून, शिवसेना (उद्धव बाळासाहेब ठाकरे) पक्षाचे युवासेना तालुकाप्रमुख समीर पोपटराव भोईटे यांनी उपमुख्यमंत्री तथा शिवसेना पक्षप्रमुख एकनाथ शिंदे यांच्या उपस्थितीत शिवसेनेत (शिंदे गट) जाहीर पक्षप्रवेश केला. यावेळी विधान परिषद उपसभापती सचिन अहिर यांची प्रमुख उपस्थिती होती. या पक्षप्रवेशामुळे दौंड तालुक्यातील राजकीय समीकरणांमध्ये नव्या चर्चांना उधाण आले आहे.
समीर भोईटे यांनी गेल्या काही वर्षांत युवासेनेच्या माध्यमातून दौंड तालुक्यात युवकांचे संघटन उभारणे, विविध सामाजिक उपक्रम राबविणे तसेच नागरिकांच्या प्रश्नांवर सातत्याने आवाज उठविण्याचे काम केले आहे. युवकांमध्ये त्यांचा चांगला संपर्क असून, नुकत्याच झालेल्या जिल्हा परिषद निवडणुकीतही त्यांनी सक्रिय भूमिका बजावली होती.
त्यांच्या पक्षप्रवेशामुळे शिवसेनेला दौंड तालुक्यात संघटनात्मक बळ मिळणार असल्याची चर्चा राजकीय वर्तुळात सुरू झाली आहे. विशेषतः युवकांमध्ये असलेला त्यांचा प्रभाव आगामी निवडणुकांच्या पार्श्वभूमीवर शिवसेनेसाठी महत्त्वाचा ठरणार असल्याचे राजकीय जाणकारांचे मत आहे.
पक्षप्रवेशानंतर समीर भोईटे यांनी आपल्या भावना व्यक्त करताना सांगितले, “मा. एकनाथजी शिंदे साहेब आणि मा. सचिनभाऊ अहिर यांनी माझ्यावर दाखवलेल्या विश्वासाबद्दल मी मनःपूर्वक आभारी आहे. शिवसेनेची विचारधारा तळागाळातील जनतेपर्यंत पोहोचविण्यासाठी, दौंड तालुक्यात पक्षसंघटना अधिक मजबूत करण्यासाठी आणि सर्वसामान्य नागरिकांच्या प्रश्नांसाठी पूर्ण ताकदीने काम करणार आहे. जनतेचा विश्वास संपादन करून विकासाभिमुख राजकारणाला प्राधान्य देणे हेच माझे ध्येय राहील.”
यावेळी उपमुख्यमंत्री एकनाथ शिंदे यांनी समीर भोईटे यांचे शिवसेनेत स्वागत करत त्यांच्या पुढील राजकीय वाटचालीस शुभेच्छा दिल्या. पक्ष संघटन मजबूत करण्यासाठी आणि जनतेच्या प्रश्नांवर प्रभावीपणे काम करण्यासाठी त्यांनी समीर भोईटे यांच्याकडून मोठ्या अपेक्षा व्यक्त केल्या.
या पक्षप्रवेशामुळे दौंड तालुक्यातील राजकीय वातावरण आणखी तापण्याची चिन्हे असून, आगामी काळात इतर काही पदाधिकारी व कार्यकर्तेही शिवसेनेत प्रवेश करण्याची शक्यता राजकीय वर्तुळात व्यक्त केली जात आहे. त्यामुळे दौंडच्या राजकारणात या पक्षप्रवेशाला विशेष महत्त्व प्राप्त झाले आहे.
✍🏻मुख्य संपादक – संदिप बारटक्के
