वृत्तवेध मarathi / संदिप बारटक्के
दौंड | दौंड तालुक्यातील खोरवडी व आलेगाव परिसरातील विविध वाड्या-वस्त्यांवर मध्यरात्री पाच ते सात अज्ञात दरोडेखोरांनी दरोडा टाकत नागरिकांना मारहाण करून सुमारे ७ लाख १० हजार रुपयांचा ऐवज लंपास केल्याची घटना घडली आहे. याप्रकरणी दौंड पोलीस ठाण्यात गुन्हा दाखल करण्यात आला आहे.
याबाबत सहाय्यक पोलीस उपनिरीक्षक संतोष मल्हारी शिंदे (वय ५०) यांनी फिर्याद दिली आहे. हा प्रकार १० जून २०२६ रोजी पहाटे १ ते ३.१० वाजण्याच्या दरम्यान खोरवडी गाव हद्दीतील आवदे वस्ती, बाबीर नगर तसेच आलेगाव परिसरातील विविध वाड्या-वस्त्यांवर घडला.
दौंड पोलिसांनी दिलेल्या माहितीनुसार पाच ते सात अज्ञात आरोपींनी चाकू, कोयता, लोखंडी रॉड, लोखंडी पाईप, लाकडी काठ्या व दगड यांसारख्या घातक हत्यारांचा वापर करून नागरिकांना मारहाण, शिवीगाळ व दमदाटी केली. त्यानंतर त्यांनी विविध घरांमधील सोन्याचे दागिने, रोख रक्कम, मोबाईल फोन तसेच मोटारसायकली असा एकूण ७ लाख १० हजार रुपयांचा मुद्देमाल जबरदस्तीने चोरून नेला.
दरोडेखोरांनी अर्चना आवदे, शोभा खोमणे, नकाबाई शिंदे, मुकिंदा चलवादी, मिना कदम, विनय कदम यांच्यासह अन्य नागरिकांच्या घरांमधील सोन्याचे दागिने, रोख रक्कम, मोबाईल फोन व दुचाकी वाहने लंपास केली. यामध्ये सुमारे ६८ ग्रॅम वजनाचे विविध सोन्याचे दागिने, १७ हजार रुपयांची रोख रक्कम, दोन मोबाईल फोन आणि दोन मोटारसायकलींचा समावेश आहे.
या घटनेमुळे खोरवडी व आलेगाव परिसरात भीतीचे वातावरण निर्माण झाले असून नागरिकांमध्ये असुरक्षिततेची भावना पसरली आहे. घटनेची माहिती मिळताच दौंड पोलिसांनी घटनास्थळी भेट देऊन पंचनामा केला.
या प्रकरणाचा पुढील तपास पोलीस उपनिरीक्षक रुपेश कदम करीत असून आरोपींचा शोध घेण्यासाठी विशेष पथके कार्यरत करण्यात आली आहेत. गुन्ह्याची नोंद पोलीस उपनिरीक्षक बिद्री यांनी केली आहे.
✍🏻मुख्य संपादक – संदिप बारटक्के
