वृत्तवेध मarathi /संदिप बारटक्के
दौंड : दौंड तालुक्यातील खोरवडी परिसरात रस्त्यावर गाडीने कट मारल्याच्या क्षुल्लक कारणावरून एका तरुण वकिलावर लाथाबुक्क्यांनी व लोखंडी रॉडने मारहाण करण्यात आल्याची धक्कादायक घटना समोर आली आहे. या प्रकरणी दोघा बाप–लेकांविरोधात दौंड पोलिस ठाण्यात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, महेश संतोष काळे (वय २५, व्यवसाय – वकील, रा. आलेगाव काळेवस्ती, ता. दौंड) हे २० डिसेंबर २०२५ रोजी सायंकाळी साडेसहा वाजण्याच्या सुमारास मोटारसायकलवरून खोरवडी गावच्या हद्दीतील आव्हाळे वस्ती परिसरातून दौंड–सिद्धटेक रस्त्याने जात होते. यावेळी त्यांच्या ओळखीचे नामदेव भिकाजी सुर्यवंशी व त्यांचा मुलगा स्वप्नील नामदेव सुर्यवंशी (दोघे रा. देऊळगाव राजे, ता. दौंड) यांनी त्यांच्या दुचाकीने फिर्यादीच्या मोटारसायकलला कट मारला.
कट मारल्याबाबत विचारणा केल्याचा राग मनात धरून आरोपींनी फिर्यादीस शिवीगाळ करत लाथाबुक्क्यांनी मारहाण केली. तसेच “तुला आज जिवे मारून टाकतो” अशी धमकी देत स्वप्नील सुर्यवंशी याने जवळच पडलेला लोखंडी रॉड उचलून फिर्यादीवर हल्ला केला, असे तक्रारीत नमूद करण्यात आले आहे.
या प्रकरणी दौंड पोलिस ठाण्यात भारतीय न्याय संहिता कलम ११८(२), ११५(२), ३५१(२), ३५२, ३(५) अंतर्गत गुन्हा दाखल करण्यात आला आहे. पोलीस हवा. पांढरे यांनी गुन्हा दाखल केला असून पुढील तपास पोलीस हवा. म्हेत्रे करीत आहेत.
✍🏻मुख्य संपादक – संदिप बारटक्के
