✍️ अख्तर काझी
दौंड : ज्ञानसंकल्प सामाजिक संस्था, महाराष्ट्र राज्य यांच्या वतीने ‘आदर्श लघु व्यावसायिक उद्योजकता पुरस्कार’ प्रदान करून सौ. भारती अनिल संसारे यांचा गौरव करण्यात आला.
समाजाप्रती असलेली बांधिलकी, उद्योजकतेच्या क्षेत्रातील उल्लेखनीय कार्य आणि संघर्षातून उभे राहून यशस्वी वाटचाल केल्याबद्दल त्यांना हा पुरस्कार प्रदान करण्यात आला. आपल्या कार्यातून समाजासाठी योगदान देण्याच्या भावनेने त्यांनी लघु उद्योजकतेच्या क्षेत्रात वेगळी ओळख निर्माण केली असून अनेकांसाठी त्या प्रेरणास्थान ठरल्या आहेत.
ज्ञानसंकल्प सामाजिक संस्थेने दिलेल्या सन्मानपत्रात नमूद करण्यात आले आहे की, जीवनातील अनेक संकटांवर मात करत त्यांनी आपल्या कार्यावर अविचल निष्ठा ठेवली. स्वतःच्या अडचणींपेक्षा इतरांच्या दुःखात सहभागी होण्याचा त्यांचा स्वभाव आणि समाजहिताची जाणीव हे त्यांच्या व्यक्तिमत्त्वाचे वैशिष्ट्य आहे. राखेतून नव्याने भरारी घेणाऱ्या फिनिक्स पक्ष्याप्रमाणे त्यांनी प्रतिकूल परिस्थितीवर मात करून यश संपादन केले असून त्यांचे कार्य समाजासाठी प्रेरणादायी असल्याचे संस्थेने गौरवोद्गार काढले.
यावेळी भारती अनिल संसारे यांना पुढील वाटचालीसाठी शुभेच्छा देण्यात आल्या तसेच समाजोपयोगी व उद्योजकीय कार्य अधिक व्यापकपणे सुरू ठेवण्याचा विश्वास व्यक्त करण्यात आला.
✍🏻मुख्य संपादक – संदिप बारटक्के
