वृत्तवेध मarathi / संदिप बारटक्के
दौंड : जागतिक महिला दिनाच्या निमित्ताने महिलांच्या आरोग्याबाबत जनजागृती करण्याच्या उद्देशाने दौंड येथील छत्रपती शिवाजी महाराज चौक, सरनोत गल्ली परिसरातील पाटील हॉस्पिटल च्या वतीने मोफत आरोग्य तपासणी शिबिराचे आयोजन करण्यात आले होते. या शिबिराला शहरातील महिलांचा उत्स्फूर्त प्रतिसाद मिळाला.
या आरोग्य शिबिरामध्ये विविध प्रकारच्या तपासण्या करण्यात आल्या. त्यामध्ये हिमोग्लोबिन (रक्तातील हिमोग्लोबिन प्रमाण) तपासणी १२७, रक्तातील साखर तपासणी १२७, ईसीजी (हृदय तपासणी) ९०, त्वचा तपासणी व उपचार २२३, केस गळती व कोंडा उपचार १८० तसेच चामखीळ अल्प दरात काढणे २३ अशा विविध तपासण्या करण्यात आल्या. या शिबिराचा एकूण २२६ महिलांनी लाभ घेतला.
या प्रसंगी दौंडच्या नगराध्यक्षा दुर्गादेवी इंद्रजित जगदाळे, माजी नगराध्यक्षा शीतलताई योगेश कटारिया, नगरसेविका रेणुका विजय थोरात, सरोज बाबलू कांबळे तसेच उज्वला मनीष परकाळे यांनी शिबिराला भेट देऊन महिलांशी संवाद साधला व उपक्रमाचे कौतुक केले.
शिबिरात सहभागी झालेल्या सर्व महिलांना गुलाबाचे फूल देऊन सन्मानित करण्यात आले. तसेच उपस्थित नगराध्यक्षा व नगरसेविकांचा मोगऱ्याचे व लिलीचे रोप देऊन सत्कार करण्यात आला. शिबिरादरम्यान महिलांना मोठ्या स्क्रीनवर त्वचा व केसांच्या विविध आधुनिक उपचार पद्धतींबाबत माहिती देणारे व्हिडिओ दाखविण्यात आले. यामुळे महिलांना आरोग्याविषयी उपयुक्त मार्गदर्शन मिळाले.
या आरोग्य शिबिराचे आयोजन पाटील हॉस्पिटलचे सर्वेसर्वा डॉ. शिल्पा स्वप्नील पाटील व डॉ. स्वप्नील पाटील यांनी केले. महिलांच्या आरोग्याची काळजी घेण्यासाठी अशा प्रकारचे उपक्रम पुढेही राबविण्यात येणार असल्याची माहिती यावेळी डॉक्टर स्वप्नील पाटील यांनी दिली.
✍🏻मुख्य संपादक – संदिप बारटक्के
