वृत्तवेध मarathi / संदिप बारटक्के
दौंड शहरामध्ये भारतीय जनता पक्षाच्या स्थापना दिनानिमित्त उत्साहपूर्ण वातावरणात कार्यक्रम साजरा करण्यात आला. छत्रपती शिवाजी महाराज यांच्या प्रतिमेला पुष्पहार अर्पण करून कार्यक्रमाची सुरुवात झाली.
आमदार राहुल कुल, भाजप पुणे जिल्हाध्यक्ष शेखर वडणे आणि दौंड शहर अध्यक्ष रितेश ओझा यांच्या मार्गदर्शनाखाली हा कार्यक्रम यशस्वीरीत्या पार पडला. यानंतर भाजप कार्यकर्त्यांनी दौंड नगरपालिकेचे मुख्याधिकारी अवधूत तावडे यांची भेट घेऊन शहरातील विविध प्रलंबित प्रश्नांवर सविस्तर चर्चा केली.
यावेळी सार्वजनिक स्वच्छतागृहे, पार्किंगची कमतरता, ड्रेनेज व्यवस्था आणि वाढती पाणीटंचाई यांसारख्या महत्त्वाच्या समस्यांकडे लक्ष वेधण्यात आले. राजेंद्र ओझा यांच्यासह अनेक कार्यकर्त्यांनी दौंड शहरातील नागरिकांना भेडसावणाऱ्या अडचणी मांडल्या.
बैठकीदरम्यान मुख्याधिकारी अवधूत तावडे यांनी सकारात्मक प्रतिसाद देत महत्त्वाची माहिती दिली. शहरासाठी १३ नवीन सार्वजनिक स्वच्छतागृहांना मंजुरी मिळाली असून कामांना सुरुवात झाली आहे. दोन उद्यानांच्या नूतनीकरणासाठी निधी उपलब्ध झाला असून ती कामेही गतीने पूर्ण केली जातील. पार्किंग समस्येवर तोडगा काढण्यासाठी नियोजन सुरू असून ड्रेनेजची कामे आधीच सुरू झाल्याचे त्यांनी स्पष्ट केले.
तसेच पाणीटंचाई दूर करण्यासाठी नवीन पाण्याच्या टाकीचे काम प्रगतिपथावर असून लवकरच नागरिकांना दिलासा मिळेल, असा विश्वास त्यांनी व्यक्त केला. नव्याने उभारण्यात आलेल्या बस पिकअप शेड येथे बोरवेलद्वारे पाणी उपलब्ध करून देण्याचीही योजना असल्याचे त्यांनी सांगितले.
या कार्यक्रमाला भाजपचे ज्येष्ठ कार्यकर्ते मोहनलाल भंडारी, बालाप्रसाद मंत्री, राहुल भंडारी, नागेश बेलुरकर, तन्मय पवार, प्रकाश पारदासनी, विश्वजीत सोनवणे, यश कुलथे, प्रशांत कांबळे, तम्मा पालिम, जाधव काका आदींसह महिला आघाडीच्या मीना जाधव, मोनाली वीर, सरिता कुल आणि सीमा शेंडे यांची उपस्थिती होती.
कार्यक्रमाच्या शेवटी प्रशासनाकडून मिळालेल्या सकारात्मक प्रतिसादाबद्दल समाधान व्यक्त करत कार्यकर्त्यांनी पक्षाच्या विचारधारेचा प्रचार-प्रसार अधिक जोमाने करण्याचा निर्धार केला. मोनाली वीर यांनी आभार प्रदर्शन केले, तर मुख्याधिकारी अवधूत तावडे यांचा पुष्पगुच्छ देऊन सन्मान करण्यात आला.
✍🏻मुख्य संपादक – संदिप बारटक्के
