वृत्तवेध मarathi / संदिप बारटक्के
दौंड शहरातील भट्टड हॉस्पिटल आणि मॅगो इंटरनॅशनल प्री स्कूल यांच्या संयुक्त विद्यमाने ३ ते १० वयोगटातील मुलांसाठी मोफत नेत्र तपासणी शिबिराचे आयोजन करण्यात आले होते. या शिबिरामध्ये एकूण ७५ विद्यार्थ्यांची नेत्र तपासणी करण्यात आली. त्यापैकी ३० मुलांना चष्म्याची आवश्यकता असल्याचे निष्पन्न झाले असल्याची माहिती नेत्रतज्ज्ञ डॉ. चिराग भट्टड यांनी दिली.
यावेळी बोलताना डॉ. चिराग भट्टड म्हणाले, मुलांच्या सर्वांगीण विकासासाठी दृष्टी अत्यंत महत्त्वाची आहे. बालपणीच डोळ्यांशी संबंधित समस्या ओळखल्यास त्यावर योग्य वेळी उपचार करता येतात. मुलांच्या प्रत्येक हालचालीचे निरीक्षण करताना त्यांच्या दृष्टीची कार्यक्षमता तपासणे गरजेचे आहे. याच उद्देशाने या शिबिराचे आयोजन करण्यात आले आहे.
शिबिरादरम्यान काही विद्यार्थ्यांमध्ये रेटिनासंबंधी तपासणीची आवश्यकता आढळून आली. अशा विद्यार्थ्यांना पुढील तपासणीसाठी वेळ देण्यात आली असून त्यांची मोफत तपासणी भट्टड हॉस्पिटल, दौंड येथे करण्यात येणार आहे.
मॅगो इंटरनॅशनल प्री स्कूलचे प्रमुख राहुल पुरोहित आणि विकी धामणे यांनी सांगितले की, सध्या लहान मुलांमध्ये मोबाईलचा वापर मोठ्या प्रमाणात वाढला आहे. त्यामुळे डोळ्यांवर ताण येऊन विविध समस्या निर्माण होण्याची शक्यता वाढते. विद्यार्थ्यांना चष्म्याची गरज आहे का, याची माहिती पालकांना वेळेवर मिळावी आणि भविष्यातील त्रास टाळता यावा, या हेतूने या शिबिराचे आयोजन करण्यात आले. पालकांच्या सहकार्यामुळे शिबिराला उत्स्फूर्त प्रतिसाद मिळाला.
सेवा आणि सामाजिक बांधिलकीचा वारसा पुढे नेताना…
दौंड येथील ज्येष्ठ नेत्रतज्ज्ञ डॉ. प्रेमकुमार भट्टड यांनी वैद्यकीय व्यवसायासोबतच सामाजिक कार्य, नेत्रदान जनजागृती, मोफत नेत्र तपासणी शिबिरे तसेच पंढरपूर वारीतील वारकऱ्यांची मोफत तपासणी यांसारख्या उपक्रमांतून उल्लेखनीय कार्य केले आहे. त्यांच्या या सेवाभावी परंपरेचा वारसा डॉ. चिराग भट्टड समर्थपणे पुढे नेत असून समाजातील विविध स्तरांतून त्यांच्या कार्याचे कौतुक होत आहे.
✍🏻मुख्य संपादक – संदिप बारटक्के
