वृत्तवेध मarathi / संदिप बारटक्के
दौंड : आगामी पावसाळ्याच्या पार्श्वभूमीवर शहरात पाणी तुंबणे, ड्रेनेज तुंबणे तसेच नागरिकांना विविध अडचणींचा सामना करावा लागू नये यासाठी दौंड नगरपरिषदेच्या नगराध्यक्ष दुर्गादेवी इंद्रजीत जगदाळे यांनी शहरातील प्रमुख गटारी, नाले व ड्रेनेज लाईनची प्रत्यक्ष पाहणी केली.
दौंड शहरातील विविध भागांमध्ये दरवर्षी पावसाळ्यात पाणी साचण्याच्या व जलनिस्सारण व्यवस्थेच्या समस्या उद्भवत असल्याने अशा संवेदनशील ठिकाणांची यावेळी विशेष तपासणी करण्यात आली. पाहणीदरम्यान गटारी व नाल्यांमध्ये साचलेला गाळ, कचरा तसेच अडथळे दूर करण्याच्या कामांचा आढावा घेण्यात आला.
यावेळी संबंधित अधिकारी व कर्मचाऱ्यांना गटारीतील गाळ तातडीने काढण्याच्या, नालेसफाईची कामे वेगाने पूर्ण करण्याच्या तसेच पावसाळ्यापूर्वी सर्व आवश्यक प्रतिबंधात्मक उपाययोजना राबविण्याच्या सूचना नगराध्यक्षांनी दिल्या. नागरिकांना पावसाळ्यात कोणताही त्रास होऊ नये यासाठी स्वच्छता व जलनिस्सारण व्यवस्थेची कामे वेळेत पूर्ण करण्यावर भर देण्यात आला.
नगराध्यक्ष दुर्गादेवी जगदाळे यांनी प्रशासनाला शहराच्या स्वच्छतेला व नागरिकांच्या सुरक्षिततेला सर्वोच्च प्राधान्य देण्याचे निर्देश दिले. तसेच पावसाळ्यात उद्भवणाऱ्या संभाव्य समस्यांवर प्रभावी उपाययोजना करून कोणत्याही प्रकारची गैरसोय होणार नाही याची दक्षता घेण्याचे आवाहन केले.
या पाहणीमुळे पावसाळ्यापूर्वी शहरातील स्वच्छता व जलनिस्सारण व्यवस्थेच्या कामांना अधिक गती मिळणार असून नागरिकांमध्ये समाधान व्यक्त केले जात आहे.
✍🏻मुख्य संपादक – संदिप बारटक्के
