वृत्तवेध मarathi | संदिप बारटक्के
दौंड — शहरातील विविध विकासकामांसाठी तब्बल २ कोटी ३५ लाख रुपयांचा निधी मंजूर करण्यात आला असून, शहरातील अंतर्गत रस्ते, काँक्रिटीकरण व पावसाळी गटारांच्या कामांना यामुळे मोठी चालना मिळणार आहे. लोकशाहीर अण्णाभाऊ साठे नागरी वस्ती सुधारणा योजनेअंतर्गत १ कोटी ९४ लाख ७४ हजार ९१ रुपयांचा निधी मंजूर करण्यात आला आहे. तसेच गाववेस परिसरातील काँक्रिटीकरण व पेवर ब्लॉक बसविण्यासाठी ४१ लाख रुपयांचा निधी उपमुख्यमंत्री श्रीमती सुनेत्रा पवार यांच्या खासदार कार्यकाळातील खासदार निधीतून मंजूर करण्यात आला आहे.
या विकासकामांसाठी नगरसेवक इंद्रजित जगदाळे, मंगेश चलवादी, रूपेश जाधव तसेच नगरसेविका स्वाती निलेश सावंत यांनी सातत्याने पाठपुरावा केला होता. राज्याचे माजी उपमुख्यमंत्री स्वर्गीय अजित पवार यांच्याकडे पुणे जिल्हा परिषदेचे अध्यक्ष वीरधवल जगदाळे आणि नगराध्यक्ष दुर्गादेवी इंद्रजित जगदाळे यांनी देखील निधीसाठी विशेष प्रयत्न केले होते.
मंजूर करण्यात आलेल्या कामांमध्ये प्रभाग क्रमांक ६ मधील साठेनगर येथे विविध ठिकाणी काँक्रिटीकरण व पावसाळी गटारांसाठी १ कोटी ५२ हजार ८०० रुपये मंजूर झाले आहेत. तसेच प्रभाग क्रमांक ७ मधील तुकाईनगर येथे काँक्रिटीकरण व पावसाळी गटारांसाठी ३७ लाख ९९ हजार २९० रुपये आणि डांबरीकरण व पावसाळी गटारांसाठी ५६ लाख २२ हजार ४ रुपये मंजूर करण्यात आले आहेत.
सदर कामांची निविदा प्रक्रिया पूर्ण झाली असून लवकरच प्रत्यक्ष कामांना सुरुवात होणार आहे. या विकासकामांमुळे अनेक भागांतील अंतर्गत रस्ते व पावसाळी गटारांचे प्रश्न मार्गी लागणार असल्याने नागरिकांकडून समाधान व्यक्त होत आहे.
नगराध्यक्ष दुर्गादेवी जगदाळे यांनी सांगितले की, “दौंड शहराच्या सर्वांगीण विकासासाठी उपमुख्यमंत्री तथा पुणे जिल्ह्याच्या पालकमंत्री श्रीमती सुनेत्रावहिनी पवार आणि पुणे जिल्हा परिषदेचे अध्यक्ष वीरधवल जगदाळे यांच्या माध्यमातून भविष्यातही अधिकाधिक निधी आणण्यासाठी प्रयत्न सुरू राहतील. विकासकामांचा दर्जा चांगला राहण्यासाठी नागरिकांनीही कामांवर लक्ष ठेवावे.”
यावेळी त्यांनी घरपट्टी व नळपटी वसुलीसाठी सहकार्य करणाऱ्या दौंडकर नागरिकांचे आभारही मानले.
✍🏻मुख्य संपादक – संदिप बारटक्के
