✍️अख्तर काझी
दौंड : शहरातील मोकाट फिरणारी जनावरे( गाय ,बैल) पकडून निश्चित केलेल्या गोशाळेत जमा करण्याबाबतच्या कामाचा ठेका दौंड नगरपालिकेने किरण डिस्ट्रीब्युटर्स या कंपनीला दिलेला होता. या ठेकेदाराने दिनांक 9 फेब्रुवारी 2026 ते 16 फेब्रुवारी 2026 या कालावधीत शहरातील 53 जनावरे पकडून ती गोशाळेत जमा न करता त्यांचा अपहर केला असल्याबाबतची घटना उघडकीस आली आहे. याप्रकरणी दौंड नगरपालिकेचे मुख्याधिकारी अवधूत तावडे यांनी फिर्याद दिली, दौंड पोलिसांनी किरण डिस्ट्रीब्युटर्स, प्रो. प्रा. किरण नितीन वांभिरे विरोधात भारतीय न्याय संहिता कलम 316(5) प्रमाणे गुन्हा दाखल केला असल्याबाबतची माहिती ठाणे अंमलदार बी. एन. रोटे यांनी दिली.
पोलिसांनी दिलेल्या माहितीनुसार, दौंड नगरपालिकेकडून, शहरात फिरणारी मोकाट जनावरे पकडून मान्यताप्राप्त गोशाळेत जमा करण्याबाबत च्या कामाचा ठेका किरण डिस्ट्रीब्युटर्स कंपनीला(दि.29/9/2025) देण्यात आला होता. त्या अनुषंगाने ठेकेदाराने शहरातील मोकाट फिरणारे जनावरे पकडून गोशाळेत जमा करण्याचे कामास सुरुवात केली होती. ठेकेदाराने दिनांक 14 ऑक्टोबर 2025 ते 29 जानेवारी 2026 या कालावधीमध्ये एकूण 174 जनावरे( गाय ,बैल) पकडून श्री बोरमलनाथ गोशाळा ट्रस्ट बोरीपारधी, चौफुला,ता. दौंड व शिवशंभो शाळा ट्रस्ट ,पुणे येथे जमा केली. त्याबाबतचे आवश्यक ते दाखले जोडून त्याप्रमाणे नगरपालिकेकडे बिले सादर केली. कागदपत्रांची पडताळणी करून नगरपालिकेने ठेकेदारास बिलांची रक्कम अदा केली.
त्यानंतर मी किरण डिस्ट्रीब्युटर्स( किरण नितीन वांभिरे) यांनी दिनांक 9 फेब्रुवारी 2026 ते 16 फेब्रुवारी 2026 या कालावधीमध्ये शहरातील एकूण 53 जनावरे पकडून ते सुरक्षित रित्या गोशाळेत जमा करण्यात आले असल्याबाबतचे जिओ टॅगिंग चे फोटो सोबत असणारे बिल( रक्कम रु.3 लाख 71 हजार) नगरपालिकेकडे 16 फेब्रुवारी रोजी सादर केले होते. त्यानुसार सदर बिल मंजूर करण्यासाठी, जनावरे ज्या गोशाळेत दाखल केले त्याची पडताळणी करण्यासाठी ज्या गोशाळेत जनावरे जमा करण्यात आली आहेत त्या गोशाळेचा दाखला ठेकेदाराकडे मागितला असता त्यांनी तो दाखला सादर केला नाही. त्यामुळे नगरपालिकेने नोटीसीद्वारे ठेकेदाराकडे सदर कालावधीमध्ये गो शाळेत जमा केलेल्या जनावरांचा दाखला व इतर कागदपत्रांची मागणी केली. परंतु ठेकेदाराने सदर नोटीस ला असमाधानकारक उत्तर देऊन अद्याप पर्यंत जनावरे जमा केलेला दाखला नगरपालिकेकडे सादर केलेला नाही. त्यामुळे या ठेकेदाराने जनावरे गोशाळेत जमा केले अगर कसे याबाबत नगरपालिकेला शंका निर्माण झालेली आहे.
ठेकेदार किरण डिस्ट्रीब्युटर्स यांनी दिनांक 9 फेब्रुवारी 2026 ते 16 फेब्रुवारी 2026 या कालावधीमध्ये एकूण 53 गाय ,बैल जनावरे पकडून ते सुरक्षितरीत्या गोशाळेत जमा न करता त्यांच्याकडे दिलेले कंत्राट व त्यापोटी त्यांचेवर सोपविण्यात आलेला जनावरांचा कायदेशीर ताब्याचा गैरफायदा घेऊन ठेकेदाराने या 53 जनावरांचा गैर कायदेशीरपणे अपहार केला आहे अशी माहिती फिर्यादीमध्ये नमूद करण्यात आली आहे.
✍🏻मुख्य संपादक – संदिप बारटक्के
