वृत्तवेध मarathi / संदिप बारटक्के
डोंबिवली येथे डॉक्टर व पॅरामेडिकल कर्मचाऱ्यांवर झालेल्या मारहाणीच्या घटनेचा दौंड मेडिकल असोसिएशनने तीव्र निषेध व्यक्त करत डॉक्टर व वैद्यकीय कर्मचाऱ्यांच्या सुरक्षिततेसाठी ठोस उपाययोजना करण्याची मागणी केली आहे. यासंदर्भात असोसिएशनच्या वतीने दौंड पोलीस स्टेशनचे पोलीस निरीक्षक यांना निवेदन देण्यात आले.
निवेदनात म्हटले आहे की, डॉक्टर, परिचारिका आणि पॅरामेडिकल कर्मचारी हे दिवस-रात्र समाजाच्या आरोग्यसेवेसाठी कार्यरत असतात. उपचारादरम्यान उद्भवणाऱ्या वैद्यकीय गुंतागुंती किंवा प्रतिकूल परिणामांमुळे कोणालाही कायदा हातात घेण्याचा अधिकार नाही. अशा हिंसक घटनांमुळे डॉक्टरांचे मनोबल खचते, आरोग्य व्यवस्थेवर विपरीत परिणाम होतो आणि त्याचा फटका सर्वसामान्य रुग्णांनाही बसतो.
डोंबिवलीतील घटनेतील दोषींवर कठोर आणि कायदेशीर कारवाई करण्यात यावी तसेच डॉक्टर संरक्षणाबाबतची भूमिका वरिष्ठ स्तरापर्यंत पोहोचवावी, अशी मागणीही असोसिएशनने केली आहे.
दौंड शहर व परिसरातील शासकीय तसेच खासगी रुग्णालयांमध्ये डॉक्टर आणि वैद्यकीय कर्मचाऱ्यांना सुरक्षित वातावरणात सेवा देता यावी, यासाठी असोसिएशनने काही महत्त्वपूर्ण मागण्या केल्या आहेत. त्यामध्ये महाराष्ट्र वैद्यकीय सेवा व्यक्ती व वैद्यकीय सेवा संस्था (हिंसाचार व मालमत्तेचे नुकसान प्रतिबंधक) अधिनियमाची काटेकोर अंमलबजावणी, डॉक्टर किंवा रुग्णालयांवर हल्ला अथवा धमकी देणाऱ्यांविरुद्ध तात्काळ गुन्हे दाखल करून कठोर कारवाई, प्रमुख रुग्णालयांमध्ये आवश्यकतेनुसार पोलीस गस्त वाढविणे, डॉक्टर व पोलीस प्रशासन यांच्यात समन्वयासाठी अधिकृत संपर्क अधिकारी किंवा तातडीची संपर्क व्यवस्था निर्माण करणे तसेच डॉक्टर संरक्षण कायद्याबाबत रुग्ण आणि नातेवाईकांमध्ये जनजागृती करण्याची मागणी करण्यात आली आहे.
दौंड मेडिकल असोसिएशनने पोलीस प्रशासनावर विश्वास व्यक्त करत डॉक्टर, वैद्यकीय कर्मचारी आणि रुग्णालयांच्या सुरक्षिततेसाठी आवश्यक प्रतिबंधात्मक व कायदेशीर उपाययोजना तातडीने राबविण्याची अपेक्षा व्यक्त केली आहे.
असोसिएशनने स्पष्ट केले की, दौंड मेडिकल असोसिएशन ही कायद्याचा पूर्ण आदर करणारी संघटना असून समाजाला अखंड, सुरक्षित आणि गुणवत्तापूर्ण आरोग्यसेवा देणे हेच तिचे ध्येय आहे. सुरक्षित कार्यपरिसर उपलब्ध करून देणे ही प्रशासन आणि समाजाची संयुक्त जबाबदारी असल्याचेही निवेदनात नमूद करण्यात आले आहे.
✍🏻मुख्य संपादक – संदिप बारटक्के
