संदिप बारटक्के
दौंड : दौंड शहर नाभिक संघटनेच्या वतीने श्री संत सेना महाराज पुण्यतिथी सोहळा दौंड शहरातील श्री विठ्ठल मंदिर येथे भक्तिमय आणि उत्साहपूर्ण वातावरणात संपन्न झाला. संघटनेचे अध्यक्ष भगवान बंड यांच्या नेतृत्वाखाली आयोजित करण्यात आलेल्या या सोहळ्यास नाभिक समाजबांधवांसह विविध क्षेत्रांतील मान्यवरांची मोठ्या संख्येने उपस्थिती होती.
सोहळ्याची सुरुवात सकाळी ६.३० वाजता श्री विठ्ठल मंदिरात श्री. निरंजन पंडित यांच्या हस्ते संत सेना महाराजांच्या प्रतिमेचे व विठ्ठल-रुक्मिणीचे विधिवत अभिषेक करून करण्यात आली. यानंतर सकाळी १० ते १२ या वेळेत ह.भ.प. भागवताचार्य यतिराज महाराज लोहोर (आळंदी देवाची) यांचे संत सेना महाराजांच्या जीवनकार्यावर आधारित भक्तिमय कीर्तन झाले. त्यांच्या रसाळ वाणीतून संत सेना महाराजांचा त्याग, भक्ती, समाजप्रबोधन आणि मानवतेचा संदेश उपस्थित भाविकांपर्यंत पोहोचला.
कीर्तनानंतर श्री संत सेना महाराजांच्या पालखीची मंदिर परिसरातून प्रदक्षिणा काढण्यात आली. यावेळी ‘संत सेना महाराजांचा जयजयकार’ आणि विठ्ठल नामाचा गजर करण्यात आल्याने परिसर भक्तिरसात न्हाऊन निघाला. सोहळ्यानिमित्त महाभंडाऱ्याचे आयोजन करण्यात आले होते. भाविकांनी महाप्रसादाचा लाभ घेतला.
या धार्मिक सोहळ्याला समस्त भजनी मंडळ, दौंड यांचे विशेष सहकार्य लाभले. संत सेना महाराज पुण्यतिथीनिमित्त दौंड शहरातील नाभिक समाजबांधव तसेच सर्व सलून व्यावसायिक, धार्मिक, सामाजिक व राजकीय क्षेत्रातील पदाधिकारी आणि मान्यवरांनी उपस्थित राहून संत सेना महाराजांना पुष्प अर्पण करून अभिवादन केले.
संत सेना महाराजांच्या पुण्यतिथीचे औचित्य साधून दौंड शहरातील नाभिक व्यावसायिकांनी आपली दुकाने बंद ठेवून सोहळ्यात सहभाग घेतला. त्यामुळे समाजबांधवांमध्ये एकजूट आणि संत सेना महाराजांविषयीची श्रद्धा दिसून आली.
कार्यक्रम यशस्वी करण्यासाठी अध्यक्ष भगवान आप्पा बंड, उपाध्यक्ष गोरख साळुंके, सचिव रविंद्र बंड, सहसचिव ह.भ.प. गजानन जाधव यांच्यासह आजी-माजी पदाधिकारी व कार्यकर्त्यांनी विशेष परिश्रम घेतले. त्यांच्या नियोजनामुळे संपूर्ण सोहळा उत्साहात पार पडला.
✍🏻मुख्य संपादक – संदिप बारटक्के
