वृत्तवेध मarathi / संदिप बारटक्के
दौंड : शहरातील सरपंच वस्ती–गोपाळवाडी रोड परिसरात वाढत असलेल्या काही गैरप्रकारांमुळे स्थानिक नागरिक, महिला, मुली आणि ज्येष्ठ नागरिकांमध्ये असुरक्षिततेची भावना निर्माण झाली असून संबंधितांवर कठोर कारवाई करण्याची मागणी नागरिकांनी पोलीस प्रशासनाकडे केली आहे.
मिळालेल्या माहितीनुसार, या परिसरात दररोज सायंकाळी ६ ते ९ या वेळेत मोठ्या प्रमाणात महिला, मुली, विद्यार्थीनी तसेच ज्येष्ठ नागरिकांची भाजी मंडई व इतर कामांसाठी ये-जा असते. मात्र काही टवाळखोर व्यक्ती सार्वजनिक ठिकाणी विनाकारण गर्दी करून थांबत असल्याचे नागरिकांचे म्हणणे आहे. महिलांकडे व मुलींकडे पाहणे, टिप्पणी करणे, अश्लील हावभाव करणे, मोठमोठ्याने आरडाओरडा करणे तसेच सार्वजनिक शांततेचा भंग करणारे प्रकार घडत असल्याच्या तक्रारी पुढे येत आहेत. त्यामुळे महिला व मुलींमध्ये भीतीचे वातावरण निर्माण झाले आहे.
याच परिसरात अवैधरित्या मटका जुगार तसेच ऑनलाईन चक्री गेमच्या माध्यमातून जुगार सुरू असल्याची चर्चा नागरिकांमध्ये सुरू आहे. या प्रकारांमुळे परिसरात संशयित व्यक्तींची वर्दळ वाढल्याचे सांगितले जात असून कायदा व सुव्यवस्थेचा प्रश्न निर्माण होण्याची शक्यता व्यक्त केली जात आहे.
दरम्यान, परिसरातील एका बिअर शॉपीबाबतही नागरिकांनी नाराजी व्यक्त केली आहे. संबंधित दुकान निर्धारित वेळेपेक्षा उशिरापर्यंत, रात्री उशिरा सुरू राहत असल्याचा आरोप करण्यात आला आहे. त्यामुळे मद्यधुंद व्यक्तींची गर्दी वाढून गोंधळ, शिवीगाळ, मोठमोठ्याने बोलणे, वाहनांचा आवाज आदी प्रकार घडत असल्याचे नागरिकांचे म्हणणे आहे. याचा त्रास परिसरातील महिला, विद्यार्थी, ज्येष्ठ नागरिक आणि लहान मुलांना सहन करावा लागत असल्याचे सांगण्यात आले.
या पार्श्वभूमीवर संबंधित भागात नियमित पोलीस गस्त वाढविणे, महिलांची छेडछाड करणाऱ्या व्यक्तींवर कठोर कायदेशीर कारवाई करणे, अवैध मटका व ऑनलाईन जुगाराविरोधात विशेष मोहीम राबविणे तसेच नियमांचे उल्लंघन करणाऱ्या व्यावसायिकांवर कडक कारवाई करावी, अशी मागणी स्थानिक नागरिकांनी पोलीस प्रशासनाकडे केली आहे.
सरपंच वस्ती परिसरातील नागरिकांच्या या तक्रारींची दखल घेऊन पोलीस प्रशासन कोणती पावले उचलते, याकडे स्थानिक रहिवाशांचे लक्ष लागले आहे.
✍🏻मुख्य संपादक – संदिप बारटक्के
