वृत्तवेध मarathi / संदिप बारटक्के
दौंड : शासन निर्णय क्रमांक न.पा.वे.-२०२४/प्र.क.४० (३९)/नवी-१६ (ई-७३१३७१) दि. १४ मार्च २०२४ नुसार दौंड येथे राष्ट्र संत गाडगेबाबा यांच्या स्तंभाचे नूतनीकरण व सुशोभीकरणासाठी रुपये १० लाख निधी मंजूर करण्यात आला होता.
मात्र, इतका कालावधी उलटूनही संबंधित कामाची कोणतीही सुरुवात झालेली नाही, याबाबत तीव्र नाराजी व्यक्त करत सखल परीट समाजाने प्रशासनाकडे थेट चौकशी केली आहे.
यासंदर्भात महाराष्ट्र परीट (धोबी) सेवा मंडळाच्या वतीने सार्वजनिक बांधकाम विभाग व मुख्याधिकारी यांना लेखी निवेदन देण्यात आले आहे. या निवेदनात संबंधित काम का सुरू झाले नाही, याबाबत सविस्तर लेखी अहवाल द्यावा, तसेच काम कधी सुरू होणार आणि कधी पूर्ण होणार याची स्पष्ट माहिती द्यावी, अशी मागणी करण्यात आली आहे.
यावेळी महाराष्ट्र परीट सेवा मंडळाचे पुणे जिल्हा उपाध्यक्ष प्रशांत पवार, दौंड तालुका अध्यक्ष शुभम गव्हाणे, दौंड शहर अध्यक्ष गणेश शिंदे यांच्यासह अन्य पदाधिकारी उपस्थित होते.
स्थानिक स्तरावर निधी मंजूर होऊनही काम रखडल्याने नागरिकांमध्ये नाराजीचे वातावरण असून, प्रशासनाने तातडीने काम करावे, अशी जोरदार मागणी परीट समाजाकडून होत आहे.
✍🏻मुख्य संपादक – संदिप बारटक्के
