वृत्तवेध मarathi / संदिप बारटक्के
दौंड : दौंड विधानसभा मतदारसंघातील पायाभूत सुविधा, शेतकरी प्रश्न, जलसंधारण आणि क्रीडा विकासाशी संबंधित महत्त्वाच्या विषयांवर आमदार राहुल कुल यांनी जिल्हाधिकारी जितेंद्र डूडी यांची भेट घेऊन विविध मागण्यांचे निवेदन सादर केले. यावेळी संबंधित विभागांच्या वरिष्ठ अधिकाऱ्यांसमवेत विशेष बैठका आयोजित करून प्रलंबित प्रश्नांना गती देण्याची मागणी करण्यात आली.
पुणे-सोलापूर (हडपसर-यवत) तसेच पुणे-शिरूर महामार्गावरील प्रस्तावित उन्नत मार्गाचे काम लवकरच सुरू होणार असून, कामादरम्यान मोठ्या प्रमाणावर वाहतूक कोंडी होण्याची शक्यता आहे. त्यामुळे नागरिकांना होणारा त्रास टाळण्यासाठी सर्व संबंधित विभागांची संयुक्त बैठक घेऊन पर्यायी रस्त्यांचे पूर्वनियोजन करण्यात यावे, अशी मागणी आमदार कुल यांनी केली.
ग्रामीण भागातील खेळाडूंना दर्जेदार सुविधा उपलब्ध व्हाव्यात यासाठी भांडगाव, खडकी, देऊळगाव राजे, पारगाव आणि पाटस येथे उपक्रीडा संकुल उभारण्याचा प्रस्ताव असून, त्यासाठी आवश्यक शासकीय जागा तातडीने उपलब्ध करून देण्याची मागणी करण्यात आली.
कृषी उत्पन्न बाजार समिती, दौंड अंतर्गत शेतकऱ्यांच्या शेतमालाला योग्य बाजारपेठ मिळण्यासाठी केडगाव आणि पाटस येथे उपबाजार आवार उभारण्याचे नियोजन आहे. या प्रकल्पासाठी आवश्यक शासकीय जमीन विनामूल्य उपलब्ध करून देण्यासाठी प्रशासकीय कार्यवाही वेगाने करण्याची मागणीही करण्यात आली.
दौंड तालुक्यातील भूजल पातळी वाढविणे आणि पाणीटंचाईवर मात करण्याच्या उद्देशाने वन विभागाच्या हद्दीतील पाटस, केडगाव, भांडगाव आणि ताम्हणवाडी परिसरात नवीन तलाव उभारण्याचा प्रस्ताव आहे. या कामाला गती देण्यासाठी वन विभाग व संबंधित अधिकाऱ्यांची विशेष बैठक आयोजित करण्याची आवश्यकता आमदार कुल यांनी अधोरेखित केली.
तसेच बिहार राज्यात मनरेगा अंतर्गत यशस्वी ठरलेल्या ‘बिहार पॅटर्न’ वृक्षलागवडीच्या धर्तीवर दौंड मतदारसंघात मोठ्या प्रमाणावर वृक्षारोपण मोहीम राबविण्यासाठी आवश्यक निधी व प्रशासकीय बाबींवर विशेष बैठक घेण्याची मागणी करण्यात आली.
वन जमिनींच्या संदर्भातील प्रलंबित प्रश्नांमुळे अनेक शेतकऱ्यांना अडचणींचा सामना करावा लागत आहे. विशेषतः ७/१२ उताऱ्यांवरील वनक्षेत्राच्या नोंदी अद्यावत करण्यासाठी महसूल व वन विभागाची संयुक्त बैठक घेऊन हा प्रश्न मार्गी लावावा, अशी मागणी आमदार कुल यांनी केली.
यावेळी जिल्हाधिकारी जितेंद्र डूडी यांनी आमदार राहुल कुल यांनी मांडलेल्या सर्व मागण्या सकारात्मकपणे ऐकून घेतल्या. दौंड तालुक्याच्या विकासाशी संबंधित हे विषय अत्यंत महत्त्वाचे असल्याचे नमूद करत संबंधित विभागांच्या वरिष्ठ अधिकाऱ्यांसमवेत येत्या काही दिवसांत विशेष बैठका आयोजित करण्यात येतील, असे आश्वासन त्यांनी दिले.
दौंड तालुक्यातील वाहतूक, क्रीडा, जलसंधारण, वृक्षारोपण आणि शेतकरी हिताच्या प्रश्नांबाबत प्रशासन स्तरावर हालचाली सुरू होण्याची चिन्हे या बैठकीमुळे निर्माण झाली असून, आता प्रस्तावित बैठका आणि त्यानंतर होणाऱ्या निर्णयांकडे तालुक्याचे लक्ष लागले आहे.
✍🏻मुख्य संपादक – संदिप बारटक्के
