वृत्तवेध मarathi / संदिप बारटक्के
दौंड – जागतिक पर्यावरण दिनानिमित्त ५ जून ते १२ जून २०२६ या कालावधीत स्वच्छता अभियान राबविण्याच्या अनुषंगाने दौंड नगरपरिषद प्रशासनाने केलेल्या नियोजनावरून नगरसेवक आणि प्रशासन यांच्यात वाद निर्माण झाला आहे. नगरसेवकांना विश्वासात न घेता तसेच आरोग्य सभापतींना पूर्वकल्पना न देता कार्यक्रमाचे नियोजन करण्यात आल्याचा आरोप करत नगरसेवकांनी प्रशासनाविरोधात तीव्र नाराजी व्यक्त केली आहे.
नगरसेविका तथा आरोग्य सभापती कार्तिकी अनिल सोनवणे यांनी मुख्याधिकारी अवधूत तावडे यांना दिलेल्या निवेदनात म्हटले आहे की, जिल्हाधिकाऱ्यांच्या आदेशानुसार शहरात स्वच्छता अभियान राबविण्याच्या सूचना देण्यात आल्या होत्या. मात्र, शहरातील सर्व प्रभागातील नगरसेवक, नगरसेविका, सामाजिक संस्था व नागरिकांना सहभागी करून व्यापक नियोजन करण्याऐवजी प्रशासनाने एकतर्फी निर्णय घेत कार्यक्रमाची सुरुवात प्रभाग क्रमांक ११ मधील शिवाईदेवी मंदिर (शिवराजनगर) परिसरातून करण्याचे ठरविले.
निवेदनात प्रशासनावर नेहमीप्रमाणे प्रभाग क्रमांक ११ ला प्राधान्य दिल्याचा आरोप करण्यात आला आहे. शहरातील दुर्लक्षित व झोपडपट्टी भागांमधून स्वच्छता अभियानाची सुरुवात करणे आवश्यक असताना मनमानी पद्धतीने कार्यक्रमाचे नियोजन करण्यात आल्याचे नगरसेवकांचे म्हणणे आहे.
तसेच कार्यक्रमाबाबत कोणतीही पूर्वसूचना देण्यात आली नाही, निमंत्रण पत्रिका वेळेत पोहोचविण्यात आल्या नाहीत आणि आरोग्य सभापतींसह लोकप्रतिनिधींना पूर्णपणे डावलण्यात आल्याचा आरोपही करण्यात आला आहे. प्रशासनाची ही भूमिका पक्षपाती व राजकीय हेतूने प्रेरित असल्याचे निवेदनात नमूद करण्यात आले आहे.
नगरसेवक, नगरसेविका व आरोग्य सभापती यांनी या संपूर्ण प्रकाराचा निषेध नोंदवत कार्यक्रमाचे नियोजन करणाऱ्या संबंधित अधिकारी व कर्मचाऱ्यांवर कायदेशीर कारवाई करण्याची मागणी केली आहे. तसेच आरोग्य विभागातील जबाबदार अधिकारी व कर्मचाऱ्यांच्या कथित बेजबाबदार कारभारामुळे त्यांच्या निलंबनाचीही मागणी करण्यात आली आहे.
दरम्यान, संबंधितांवर कारवाई न झाल्यास सर्व नगरसेवक, नगरसेविका व आरोग्य सभापती लोकशाही मार्गाने तीव्र आंदोलन छेडतील, असा इशाराही निवेदनाद्वारे देण्यात आला आहे.
नागरिक हित संरक्षण मंडळाच्या सर्व नगरसेवकांच्या स्वाक्षऱ्यांसह हे निवेदन मुख्याधिकाऱ्यांकडे सादर करण्यात आले असून, आता प्रशासन यावर काय भूमिका घेते याकडे दौंड शहराचे लक्ष लागले आहे.
✍🏻मुख्य संपादक – संदिप बारटक्के
