वृत्तवेध मarathi / संदिप बारटक्के
दिवंगत प्राचार्य रेव्ह. फादर जोव्हियन डिमेलो यांच्याविषयी सोशल मीडियावर करण्यात आलेल्या आक्षेपार्ह पोस्टमुळे दौंड शहरामध्ये संतापाची लाट उसळली आहे. नहूम शिंदे नावाच्या व्यक्तीने केलेल्या या पोस्टमुळे दौंड शहरातील नागरिक, माजी विद्यार्थी, पालकवर्ग तसेच ख्रिस्ती समाजाच्या भावना दुखावल्या गेल्या आहेत.
फादर जोव्हियन डिमेलो यांनी आपल्या कार्यकाळात शिक्षण क्षेत्रात मोलाचे योगदान दिले होते. सेंट सेबेस्टियन स्कूलचे प्राचार्य म्हणून त्यांनी अनेक विद्यार्थ्यांचे जीवन घडवले. त्यांच्या निधनानंतर अशा प्रकारचा अवमानकारक मजकूर सोशल मीडियावर प्रसारित झाल्याने नागरिकांमध्ये तीव्र नाराजी व्यक्त होत आहे.
या प्रकरणी दौंड पोलीस स्टेशन येथे अधिकृत तक्रार दाखल करण्यात आली असून संबंधित व्यक्तीविरुद्ध कठोर कारवाई करण्याची मागणी करण्यात आली आहे. सदर पोस्टमुळे सामाजिक सलोखा बिघडण्याची शक्यता व्यक्त करण्यात येत असून, पोलिस प्रशासनाने तात्काळ हस्तक्षेप करावा अशी मागणी होत आहे.
तक्रारीत नमूद केल्याप्रमाणे, पुढील २४ तासांत कारवाई न झाल्यास दौंड शहरातील नागरिक, सेंट सेबेस्टियन स्कूलचे माजी व विद्यमान विद्यार्थी, पालकवर्ग आणि हितचिंतक यांच्यावतीने शांततापूर्ण व लोकशाही मार्गाने तीव्र आंदोलन उभारण्याचा इशारा देण्यात आला आहे.
दरम्यान, या घटनेमुळे शहरातील वातावरण तणावपूर्ण झाले असून पोलिस प्रशासनाच्या पुढील भूमिकेकडे सर्वांचे लक्ष लागले आहे.
✍🏻मुख्य संपादक – संदिप बारटक्के
