वृत्तवेध मarathi / संदिप बारटक्के
दौंड : शहरात भगवान महावीर स्वामी जन्म कल्याणक (महावीर जयंती) मोठ्या उत्साहात आणि भक्तीभावात साजरी करण्यात आली.
यानिमित्ताने दौंड शहरातून भगवान महावीर स्वामी यांच्या प्रतिमेची सवाद्य भव्य मिरवणूक काढण्यात आली.
महावीर स्वामी यांच्या मिरवणुकीची सुरुवात दौंड शहरातील श्री विमल पार्श्वनाथ मंदिर येथून करण्यात आली. यावेळी दौंड स्थानकवाशी श्रावक संघाचे संघपती शांतीलाल मुनोत, श्री पार्श्वनाथ श्वेतांबर जैन मंदिराचे संघपती घीसुलाल जैन, तसेच श्री १००८ चंद्रप्रभू दिगंबर जैन मंदिराचे अध्यक्ष सुशील शहा यांच्यासह मोठ्या संख्येने जैन बांधव सहभागी झाले होते.
मिरवणुकीत रथावर भगवान महावीर यांची आकर्षक प्रतिमा ठेवण्यात आली होती. तसेच घोड्यावर स्वार असलेले बालक मिरवणुकीचे विशेष आकर्षण ठरले. शहरातील विविध ठिकाणी मिरवणुकीचे स्वागत करण्यात आले.
यावेळी “शुद्ध आहार, शाकाहार”, “जगा आणि जगू द्या” यांसारख्या प्रबोधनात्मक घोषणा देत समाजप्रबोधन करण्यात आले.
कार्यक्रमादरम्यान आमदार राहुल कुल, नगराध्यक्षा दुर्गादेवी जगदाळे, उपनगराध्यक्षा छाया थोरात, तसेच अनेक मान्यवरांनी भगवान महावीर यांच्या प्रतिमेला पुष्पहार अर्पण करून अभिवादन केले.
भगवान महावीर जयंती निमित्ताने शहरात विविध सामाजिक उपक्रमही राबविण्यात आले. तसेच दौंड येथील रेल्वे उड्डाणपुलाजवळील श्री १००८ चंद्रप्रभू दिगंबर जैन मंदिरात विविध धार्मिक कार्यक्रमांचे आयोजन करण्यात आले होते.
✍🏻मुख्य संपादक – संदिप बारटक्के
