✍️ अख्तर काझी
दौंड : मार्शल आर्ट बॉक्सिंग कराटे ट्रेनिंग स्कूल, दौंड यांच्या वतीने आयोजित करण्यात आलेल्या ब्लॅक बेल्ट परीक्षा व ब्लॅक बेल्ट वितरण सोहळा मोठ्या उत्साहात आणि दिमाखात संपन्न झाला. या परीक्षेत यश संपादन करणाऱ्या एकूण ३० विद्यार्थ्यांना ब्लॅक बेल्ट प्रदान करण्यात आला.
या कार्यक्रमासाठी महाराष्ट्र प्रदेश महिला मोर्चाच्या उपाध्यक्षा कांचन कुल या प्रमुख पाहुण्या म्हणून उपस्थित होत्या. तसेच दौंड नगरपरिषदेचे गटनेते नगरसेवक योगेश कटारिया, नगरसेवक अमोल काळे, नगरसेवक विजय बोरकर, नगरसेवक नीलेश पवार, नगरसेविका वैशाली माशाळकर, सेन्साई राजेंद्र साळवे सर, गोपाळवाडी सोसायटीचे चेअरमन भीमराव होले, चिरंजीव झा , बाबा दगडे आदी मान्यवरांच्या हस्ते विद्यार्थ्यांना ब्लॅक बेल्ट प्रदान करण्यात आले.
कार्यक्रमाला विद्यार्थी, पालक व नागरिकांनी मोठ्या संख्येने उपस्थित राहून कार्यक्रमाची शोभा वाढवली. विद्यार्थ्यांनी सादर केलेल्या कराटे प्रात्यक्षिकांना उपस्थितांकडून उत्स्फूर्त दाद मिळाली.
यावेळी प्रमुख पाहुण्या कांचन कुल यांनी आपल्या मनोगतात सांगितले की, आजच्या युगात मुलींनी स्वसंरक्षणासाठी मार्शल आर्टचे प्रशिक्षण घेणे, स्वतःला शारीरिक व मानसिकदृष्ट्या सक्षम ठेवणे तसेच नियमित व्यायाम, योग आणि ट्रेकिंगद्वारे फिटनेस जपणे अत्यंत आवश्यक आहे. त्यांनी सर्व महिला व मुलींना स्वसंरक्षणाचे प्रशिक्षण घेण्याचे आवाहन केले.
कार्यक्रमात 1st Dan Black Belt प्राप्त करणारे सागर रकटे, विद्या पोकार, मयूर विंचूरकर, सिद्धी लोटके, स्वरा सोनवणे आणि आदित्य दरबारे यांनी उत्कृष्ट कराटे प्रात्यक्षिके सादर करून उपस्थित मान्यवर, पालक व प्रेक्षकांची मने जिंकली.
कार्यक्रमाच्या यशस्वी आयोजनासाठी हिरालाल साळवे, शुभम वाघ, स्वराज सोनवणे, तनय काकडे आणि कुणाल विंचूरकर यांचे विशेष सहकार्य लाभले.
या संपूर्ण कार्यक्रमाचे उत्कृष्ट नियोजन व आयोजन मास्टर संतोष प्रकाश सोनवणे यांनी केले. कार्यक्रमाच्या यशस्वीतेबद्दल त्यांनी सर्व विद्यार्थी, पालक, मान्यवर व हितचिंतकांचे मनःपूर्वक आभार मानले.
कार्यक्रमाचे सूत्रसंचालन पूजा दाभोळे यांनी केले, तर आभार प्रदर्शन संतोष सोनवणे यांनी केले.
✍🏻मुख्य संपादक – संदिप बारटक्के
