वृत्तवेध मarathi / संदिप बारटक्के
दौंड शहरासाठी अभिमानाचा आणि ऐतिहासिक क्षण ठरलेल्या पुणे–साईनगर शिर्डी एक्सप्रेस रेल्वे सेवेचा आज शुभारंभ उत्साहात संपन्न झाला. दौंड कॉर्ड लाईन रेल्वे स्थानकावर नगराध्यक्षा दुर्गादेवी इंद्रजीत जगदाळे यांच्या हस्ते रेल्वेला हिरवा झेंडा दाखवून या नव्या सेवेचे स्वागत करण्यात आले.
पुणे, अहिल्यानगर आणि साईनगर शिर्डी या महत्त्वाच्या शहरांना जोडणारी ही रेल्वे सेवा लाखो प्रवासी, विद्यार्थी, व्यावसायिक तसेच साईबाबांच्या दर्शनासाठी जाणाऱ्या भाविकांसाठी मोठा दिलासा ठरणार आहे. या सेवेच्या प्रारंभामुळे प्रवाशांना अधिक सुरक्षित, जलद आणि आरामदायी प्रवासाचा पर्याय उपलब्ध झाला आहे.
शुभारंभ प्रसंगी बोलताना नगराध्यक्षा दुर्गादेवी जगदाळे यांनी रेल्वे प्रशासनाचे अभिनंदन करत ही सेवा दौंडसह परिसरातील नागरिकांच्या दैनंदिन प्रवासासाठी अत्यंत उपयुक्त ठरेल, असा विश्वास व्यक्त केला. तसेच दौंड रेल्वे स्थानकावरील सुविधा वाढविणे, प्रवाशांसाठी अधिक सोयी उपलब्ध करून देणे आणि शहराच्या रेल्वे विकासासाठी सातत्याने पाठपुरावा करण्याची ग्वाही त्यांनी दिली.
या कार्यक्रमाला उपनगराध्यक्षा छाया थोरात, शहरातील नगरसेवक-नगरसेविका, विविध लोकप्रतिनिधी, रेल्वे अधिकारी, विद्यार्थी, नागरिक तसेच विविध क्षेत्रातील मान्यवर मोठ्या संख्येने उपस्थित होते. उपस्थितांनी रेल्वे सेवेच्या शुभारंभाचे स्वागत करत आनंद व्यक्त केला.
पुणे–साईनगर शिर्डी एक्सप्रेसच्या प्रारंभामुळे दौंड शहराची राज्यातील महत्त्वाच्या धार्मिक आणि व्यापारी केंद्रांशी जोडणी अधिक मजबूत होणार आहे. यामुळे प्रवास सुलभ होण्याबरोबरच व्यापार, शिक्षण, पर्यटन आणि धार्मिक क्षेत्रालाही चालना मिळण्याची अपेक्षा व्यक्त केली जात आहे.
या ऐतिहासिक रेल्वे सेवेच्या शुभारंभामुळे दौंड शहराच्या विकासाला नवी गती मिळणार असून नागरिकांमध्ये उत्साह आणि समाधानाचे वातावरण निर्माण झाले आहे.
✍🏻मुख्य संपादक – संदिप बारटक्के
