वृत्तवेध मarathi / संदिप बारटक्के
दौंड — शहरातील कुरकुंभ मोरी भुयारी मार्गास ‘धर्मवीर छत्रपती संभाजी महाराज भुयारी मार्ग’ तसेच दौंड नगरपरिषदेच्या जलतरण तलावास ‘विकासरत्न अजितदादा पवार जलतरण तलाव’ असे नामकरण करण्यात यावे, अशी अधिकृत मागणी दौंड नगरपालिकेच्या नगरसेविका स्वाती निलेश सावंत यांनी केली आहे.
छत्रपती संभाजी महाराज हे हिंदवी स्वराज्याचे द्वितीय छत्रपती असून स्वराज्य रक्षणासाठी व धर्मरक्षणासाठी त्यांनी प्राणार्पण केले. औरंगजेबाच्या अमानुष अत्याचारासमोर धर्मांतरास नकार देत त्यांनी दिलेले अतुलनीय बलिदान हे भारतीय इतिहासातील अद्वितीय उदाहरण आहे. त्यांच्या शौर्य, राष्ट्रनिष्ठा व धर्माभिमानामुळे त्यांना ‘धर्मवीर’ ही उपाधी प्राप्त झाली आहे.
दौंड शहरातील कुरकुंभ मोरी हे एक प्रमुख व महत्त्वाचे ठिकाण असून, स्वराज्यरक्षक धर्मवीर छत्रपती संभाजी महाराज यांना अभिवादन व सन्मान देण्यासाठी या भुयारी मार्गास ‘धर्मवीर छत्रपती संभाजी महाराज भुयारी मार्ग’ असे नामकरण करणे महत्त्वाचे आहे.असे नगरसेविका सावंत यांनी नमूद केले. तसेच, दौंड नगरपरिषदेच्या जलतरण तलावास ‘विकासरत्न अजितदादा पवार जलतरण तलाव असे नामकरण करण्याचीही त्यांनी मागणी केली आहे.
माननीय अजितदादा पवार यांनी महाराष्ट्र राज्याचे उपमुख्यमंत्री, पुणे जिल्ह्याचे पालकमंत्री तसेच अर्थमंत्री म्हणून उल्लेखनीय कार्य केले आहे. राज्याच्या सर्वांगीण विकासात त्यांचे योगदान अत्यंत महत्त्वपूर्ण राहिले आहे. दौंड शहराच्या विकासासाठी त्यांनी कुरकुंभ मोरी भुयारी मार्गासाठी निधी, दौंड सेंट्रल बिल्डिंग उभारणीसाठी निधी, विविध विकासकामांसाठी आर्थिक सहाय्य
असे मोलाचे योगदान दिले आहे. त्यांच्या अलीकडील दुःखद निधनानंतर त्यांच्या कार्याची कायमस्वरूपी स्मृती राहावी व दौंड शहराच्या विकासातील त्यांच्या योगदानाचा सन्मान व्हावा, या उद्देशाने जलतरण तलावास त्यांच्या नावाने नामकरण करण्यात यावे, अशी भावना नगरसेविका स्वाती निलेश सावंत यांनी व्यक्त केली आहे.
अशी ही मागणी जिल्हा परिषद सदस्य वीरधवल जगदाळे यांच्या प्रेरणादायी मार्गदर्शनाखाली तसेच नगराध्यक्ष दुगदिवी जगदाळे यांच्या सक्षम नेतृत्वाखाली करण्यात आली आहे.
यावेळी माजी नगरसेवक प्रविण परदेशी, मराठा महासंघाचे पुणे जिल्हा सरचिटणीस बाबा पवार, मनसेचे दौंड तालुका अध्यक्ष सचिन कुलथे, शिवसेना (ठाकरे गट) नेते संतोष जगताप,शिवसेना (ठाकरे गट)शहरप्रमुख आनंद पळसे, राष्ट्रवादी विद्यार्थी काँग्रेस शहराध्यक्ष प्रशांत धनवे, खादी ग्रामोद्योग संघाचे माजी अध्यक्ष निलेश सावंत,भाऊ भाडवलकर, सिद्धेश कदम, राकेश भोसले आदी मान्यवर उपस्थित होते.
✍🏻मुख्य संपादक – संदिप बारटक्के
