वृत्तवेध मarathi / संदिप बारटक्के
दौंड — दौंड ते अक्कलकोट मंदिर दरम्यान एसटी बस सेवेचा आज शुभारंभ करण्यात आला असून स्वामीभक्तांसाठी ही अत्यंत आनंदाची आणि सोयीची सेवा ठरणार आहे. राष्ट्रवादी काँग्रेस पक्षाच्या नगरसेविका स्वाती निलेश सावंत यांच्या सातत्यपूर्ण पाठपुराव्याला अखेर यश आले असून रविवार (ता.२४) पासून ही बस सेवा नियमित सुरू करण्यात आली आहे.
आज पहिल्या बसचे उद्घाटन उत्साहात पार पडले. यावेळी दौंड नगरपरिषदेचे गटनेते जीवराज पवार, नगरसेविका राणी लष्करे, प्रणिता शिंदे जठार, माजी नगरसेवक दत्तात्रय सावंत, उत्तम सोनवणे, सुहास वाघमारे, दीपक सोनवणे, स्वामीभक्त नागेश साळुंखे, साठे काका, मानवेंद्र शिंदे आदी मान्यवर उपस्थित होते.
स्वामीभक्तांच्या वतीने नगरसेविका स्वाती सावंत तसेच एसटी कर्मचाऱ्यांचा सत्कार करण्यात आला. यावेळी बोलताना स्वाती सावंत म्हणाल्या, “भिऊ नकोस, मी तुझ्या पाठीशी आहे,” या श्री स्वामी समर्थ महाराजांच्या वचनामुळे अनेक भक्तांना संकटाच्या आणि नैराश्याच्या काळात मानसिक आधार मिळतो. अनपेक्षित अडचणींमध्ये मार्ग निघाल्याची अनेक उदाहरणे स्वामींच्या नामस्मरणातून दिसून येतात.
त्या पुढे म्हणाल्या की, स्वामी समर्थ महाराजांची कृपा आणि स्वामीभक्तांची प्रबळ इच्छा यामुळेच दौंड ते अक्कलकोट ही एसटी बस सेवा सुरू होऊ शकली. “ही स्वामी सेवा माझ्या हातून घडली, हे मी माझे भाग्य समजते,” असेही त्यांनी नमूद केले.
या उपक्रमासाठी पुणे जिल्हा परिषद अध्यक्ष वीरधवल जगदाळे, नगराध्यक्ष दुर्गादेवी इंद्रजीत जगदाळे तसेच चालक सचिन क्षीरसागर, वाहक दिनेश कदम आणि वाहतूक अधिकारी शैलेश मोरे, दत्तात्रय तिगोटे यांचे सहकार्य लाभल्याचे त्यांनी सांगितले.
शेवटी, या बस सेवेद्वारे प्रवास करणाऱ्या सर्व स्वामीभक्तांचे मनःपूर्वक आभार व्यक्त करण्यात आले.
या नव्या बस सेवेच्या सुरूवात मुळे दौंड परिसरातील स्वामीभक्तांना अक्कलकोट येथे दर्शनासाठी जाणे अधिक सोयीचे झाले असून भाविकांमध्ये समाधानाचे वातावरण आहे.
✍🏻मुख्य संपादक – संदिप बारटक्के
