अख्तर काझी
दौंड: महावितरण कंपनीचे नवीन स्मार्ट मीटर बसविल्याने विज बिल प्रमाणापेक्षा जास्त येत असल्याचा अनुभव वीज ग्राहकांना येत असल्याने त्यांना आर्थिक भुर्दंड सोसावा लागत आहे, त्यामुळे महावितरण कंपनीने ग्राहकांच्या संमतीशिवाय स्मार्ट मीटर बसविण्याची सक्ती करू नये अशी मागणी दौंड मधील सामाजिक कार्यकर्ते तुषार कोळी यांनी केली आहे.
तुषार कोळी यांनी महावितरण कंपनी च्या दौंड येथील उपविभागीय कार्यालयाला दिलेल्या अर्जात असे नमूद केले आहे की, घरगुती वीज जोडणीवर स्मार्ट मीटर बसविण्यास आमचा विरोध असून सध्या असलेले जुने वीज मीटरच चालू ठेवावे.MERC वीज पुरवठा संहिता 2021, नियम 15 नुसार जर ग्राहकाचे सध्याचे वीज मीटर पूर्णपणे अचूक आणि चांगल्या स्थितीत कार्यरत असेल तर वीज कंपनी ग्राहकांच्या संमतीशिवाय ते मीटर बदलू शकत नाही. वीज कायदा 2003 च्या कलम 55 नुसार मीटरची अचूकता तपासण्याचा अधिकार ग्राहकाला आहे. जर महावितरण कंपनीला ग्राहकांचे मीटर बदलायचे असेल तर त्याआधी जुन्या मीटरचे अधिकृत लॅब टेस्टिंग करून ते सदोष असल्याचा लेखी अहवाल वीज ग्राहकांना द्यावा. मीटर सदोष असल्याचा अहवाल येण्याआधीच मीटर काढणे हे नियम बाह्य आहे.
राज्याचे माननीय मुख्यमंत्री तसेच ऊर्जा मंत्रालय आणि महावितरण प्रशासनाने 2026 च्या धोरणानुसार स्पष्ट केले आहे की, सर्वसामान्य घरगुती विज ग्राहकांवर स्मार्ट मीटरची कोणतीही सक्ती केली जाणार नाही. स्मार्ट मीटर पूर्णपणे ऐच्छिक असतील असे कायदेशीर नियम असतानाही महावितरणचे कंत्राटदार ,कर्मचारी कोणत्याही पूर्व सूचने शिवाय आणि ग्राहकांच्या संमतीशिवाय जबरदस्तीने स्मार्ट मीटर बसविण्याचा प्रयत्न करीत आहेत. हा सर्व प्रकार वीज नियमन आयोगाच्या नियमांचे उल्लंघन आहे. ग्राहकांची इच्छा नसताना व वीज मीटर सुस्थितीत असतानाही कंत्राटदारांनी जबरदस्तीने मीटर बदलल्यास ग्राहकांच्या हक्कांचे उल्लंघन केल्याप्रकरणी, ग्राहक गाऱ्हाणे निवारण मंच(CGRF) आणि ग्राहक न्यायालयात रीतसर दाद मागावी लागेल आणि याची संपूर्ण जबाबदारी महावितरण प्रशासनाची राहील असा इशाराही अर्जातून देण्यात आला आहे.
✍🏻मुख्य संपादक – संदिप बारटक्के
