✍️ संदिप बारटक्के
दौंड : दौंड शहरातील लहान मुला-मुलींना आनंदाचे काही क्षण अनुभवता यावेत, त्यांना सर्कस कलेची ओळख व्हावी आणि सर्कस कलाकारांना प्रोत्साहन मिळावे, या उद्देशाने नगराध्यक्ष दुर्गादेवी इंद्रजित जगदाळे पाटील यांच्या पुढाकारातून आज लहान मुला-मुलींना दौंड येथील राजकमल सर्कस दाखविण्यात आली.
सर्कसच्या विविध रोमांचक व मनोरंजनात्मक खेळांचा मुलांनी मोठ्या उत्साहात आनंद घेतला. कलाकारांचे कौशल्यपूर्ण सादरीकरण पाहताना मुलांच्या चेहऱ्यावर आनंद आणि उत्साह दिसून येत होता.
लहान मुलांना आनंद देण्यासोबतच सर्कससारख्या पारंपरिक कलेला प्रोत्साहन मिळावे आणि या कलेची ओळख नव्या पिढीला व्हावी, या उद्देशाने हा उपक्रम राबविण्यात आला. मुलांच्या चेहऱ्यावर उमटलेले हास्य आणि त्यांचा आनंद हेच या उपक्रमाचे खरे समाधान आहे, अशी भावना नगराध्यक्षांनी व्यक्त केली.
सर्कस कलाकार आपल्या कलेच्या माध्यमातून नागरिकांचे मनोरंजन करत असतात. त्यांच्या कलेला प्रोत्साहन देणे आणि त्यांना समाजातून पाठबळ मिळणे आवश्यक आहे. या भावनेतून राजकमल सर्कसच्या कलाकारांना प्रोत्साहन देण्यासाठी हा उपक्रम आयोजित करण्यात आला.
यावेळी नगरसेविका स्वाती सावंत व नगरसेविका उज्ज्वला परकाळे उपस्थित होत्या. त्यांनीही मुलांसोबत सर्कसचा आनंद घेत कलाकारांचे कौतुक केले.
या उपक्रमामुळे दौंड शहरातील लहान मुलांमध्ये उत्साहाचे वातावरण निर्माण झाले असून, नगराध्यक्षांच्या या उपक्रमाचे पालक व नागरिकांकडून कौतुक होत आहे.
✍🏻मुख्य संपादक – संदिप बारटक्के
