वृत्तवेध मarathi / संदिप बारटक्के
दौंड | शहरात तिथीनुसार छत्रपती शिवाजी महाराजांचा जन्मोत्सव सोहळा अत्यंत उत्साहपूर्ण वातावरणात आणि जल्लोषात साजरा करण्यात आला. यंदाच्या वर्षी शिवजयंती मिरवणुकीत पहिल्यांदाच मल्लखांबाच्या धाडसी प्रात्यक्षिकांचा समावेश करण्यात आल्याने ती दौंडकरांसाठी विशेष आकर्षण ठरले.
छत्रपती शिवाजी महाराजांच्या मिरवणुकीत शिवकालीन ऐतिहासिक जिवंत देखावे, मर्दानी खेळ, ढोल-ताशे, लेझीम पथके यांचा भव्य समावेश होता. मिरवणुकीच्या रथावर छत्रपती शिवाजी महाराज यांची भव्य मूर्ती विराजमान होती, तर इतर रथांवर शिवकालीन आणि धार्मिक देखावे सादर करण्यात आले होते. भगव्या ध्वजांनी सजलेला परिसर, पोवाड्यांचे सूर आणि “जय भवानी, जय शिवाजी” या जयघोषांनी संपूर्ण शहर दुमदुमून गेले होते.
शिवजयंती उत्सव समितीचे अध्यक्ष बंडू लांबडे, शिवभक्त आप्पासाहेब पवार आणि प्रवीण परदेशी यांच्या हस्ते मिरवणुकीचे उद्घाटन करण्यात आले. मिरवणुकीत इतिहासकालीन वेशभूषा केलेली पात्रे घोड्यावर स्वार होत नागरिकांचे लक्ष वेधून घेत होती.
दौंड शहरातील जामा मस्जिद परिसरात मुस्लिम बांधवांनी सरबत वाटप करून शिवभक्तांचे स्वागत केले, ज्यामुळे सामाजिक ऐक्याचा सुंदर संदेश देण्यात आला. मिरवणुकीनंतर अखिल भारतीय मराठा महासंघाच्या वतीने शिवभक्तांना महाप्रसादाचे वाटप करण्यात आले. तसेच सकाळी हिंदू व्यायाम संघ व भगवे वादळ ग्रुप यांच्या शिवज्योतीचे उत्साहात स्वागत करण्यात आले.
छत्रपती शिवाजी महाराज चौकात दिवंगत ज्येष्ठ पत्रकार वसंतराव कदम यांच्या स्मरणार्थ सरबत वाटपाचा कार्यक्रमही पार पडला.
यावेळी सातारा येथील महाराजा सयाजीराव विद्यालय मल्लखांब मंडळाच्या राष्ट्रीय स्तरावरील खेळाडूंनी मिरवणुकीत आपल्या कौशल्याचे अप्रतिम दर्शन घडवले. रणवीर मोहिते, आयुष शिंदे, आयुष काळंगे, सिद्धेश कुंभार, मंथन माने, वैष्णवी पवार, तन्वी शिवशरण, रिद्धी वेलणकर, रुद्राणी भोसले, सई घनवट, सायली लोखंडे आणि सृष्टी चव्हाण यांनी सूर्यनमस्कार, योगासने तसेच दोरी मल्लखांबासह विविध धाडसी प्रात्यक्षिके सादर केली. त्यांच्या या सादरीकरणाला नागरिकांनी टाळ्यांच्या कडकडाटात उत्स्फूर्त प्रतिसाद दिला.
एकूणच, विविध उपक्रमांनी सजलेली ही भव्य मिरवणूक दौंड शहरात शिवजयंतीचा उत्सव अधिक रंगतदार ठरवत गेली.
✍🏻मुख्य संपादक – संदिप बारटक्के
