वृत्तवेध मarathi / संदिप बारटक्के
दौंड : लोकराजा छत्रपती शाहू महाराज आणि छत्रपती संभाजी महाराज यांच्या जयंतीनिमित्त दौंड शहरातील प्रभाग क्रमांक ६ येथील स्थानिक नगरसेविका स्वाती निलेश सावंत यांच्या वतीने लहान मुलांना क्रिकेटचे साहित्य आणि फुटबॉलचे वाटप करण्यात आले. या उपक्रमातून मुलांना मैदानी खेळांकडे आकर्षित करण्याचा आणि क्रीडा संस्कृतीला चालना देण्याचा संदेश देण्यात आला.
आजच्या डिजिटल युगात अनेक लहान मुले मोबाईल आणि आभासी जगात अधिक वेळ घालवत असल्याने त्यांचे मैदानी खेळांपासून अंतर वाढत आहे. ही बाब लक्षात घेऊन मुलांनी नियमितपणे मैदानावर जाऊन क्रिकेट, फुटबॉल यांसारखे शारीरिक खेळ खेळावेत, त्यांचा शारीरिक व मानसिक विकास व्हावा आणि निरोगी जीवनशैली अंगीकारावी, या उद्देशाने हा उपक्रम राबविण्यात आला.
यावेळी नगरसेविका स्वाती सावंत यांनी मुलांशी संवाद साधत खेळाचे महत्त्व सांगितले. त्यांनी मुलांना संघभावना, शिस्त, परिश्रम आणि जिद्द या गुणांचा विकास खेळातूनच होत असल्याचे सांगून नियमित खेळण्याचे आवाहन केले.
या उपक्रमामुळे होतकरू खेळाडूंना आवश्यक क्रीडा साहित्य उपलब्ध झाल्याने त्यांना आपली खेळातील गुणवत्ता विकसित करण्याची संधी मिळणार आहे. क्रिकेट आणि फुटबॉलसारख्या सांघिक खेळांमुळे मुलांमध्ये टीम स्पिरिट, परस्पर सहकार्य, नेतृत्वगुण आणि आत्मविश्वास वाढण्यास मदत होते.
साहित्य वाटपावेळी मुलांच्या चेहऱ्यावर दिसणारा आनंद आणि उत्साह पाहून नगरसेविका स्वाती सावंत याही मुलांमध्ये रमून गेल्या. मुलांनीही आनंद व्यक्त करत नियमित मैदानावर खेळण्याचा संकल्प केला.
या सामाजिक व प्रेरणादायी उपक्रमाचे प्रभागातील नागरिक, पालक आणि क्रीडाप्रेमींनी स्वागत करत नगरसेविका स्वाती निलेश सावंत यांच्या कार्याचे कौतुक केले. अशा उपक्रमांमुळे मुलांमध्ये खेळाची आवड निर्माण होऊन भविष्यात अधिकाधिक खेळाडू घडण्यास निश्चितच हातभार लागेल, असा विश्वास नागरिकांनी व्यक्त केला.
✍🏻मुख्य संपादक – संदिप बारटक्के
