वृत्तवेध मarathi / संदिप बारटक्के
दौंड पंचायत समितीच्या सभापतिपदी सुखदेव चोरमले तर उपसभापतिपदी अमृता गिरमकर यांची बिनविरोध निवड झाली.दौंड पंचायत समितीच्या इतिहासात प्रथमच भारतीय जनता पक्षाच्या उमेदवारांची सभापती व उपसभापती पदावर निवड झाल्याने भाजप कार्यकर्त्यांमध्ये आनंदाचे वातावरण आहे.
दौंड शहरातील पंचायत समिती सभागृहात पार पडलेल्या बैठकीत या निवडी करण्यात आल्या. या निवड प्रक्रियेसाठी पीठासीन अधिकारी म्हणून प्रांताधिकारी रेवणनाथ लबडे यांनी काम पाहिले. चौदा सदस्यीय पंचायत समितीत भारतीय जनता पक्षाचे ८ तर राष्ट्रवादी काँग्रेस पक्षाचे ६ सदस्य असे बलाबल आहे.
सभापतिपदासाठी भाजपकडून सुखदेव सोनबा चोरमले (खामगाव गण) तर राष्ट्रवादी काँग्रेस पक्षाकडून प्रविण किसन दिवेकर (वरवंड गण) यांनी उमेदवारी अर्ज दाखल केले होते. तसेच उपसभापतिपदासाठी भाजपकडून अमृता अभिमन्यू गिरमकर (देऊळगाव राजे गण) तर राष्ट्रवादी काँग्रेस पक्षाकडून मनिषा संतोष ताकवणे (पारगाव गण) यांनी अर्ज दाखल केले होते.
दरम्यान राष्ट्रवादी काँग्रेस पक्षाचे उमेदवार प्रविण दिवेकर व मनिषा ताकवणे यांनी आपले उमेदवारी अर्ज मागे घेतल्याने सभापती व उपसभापतिपदावर अनुक्रमे सुखदेव सोनबा चोरमले व अमृता अभिमन्यू गिरमकर यांची बिनविरोध निवड झाल्याचे पीठासीन अधिकारी रेवणनाथ लबडे यांनी जाहीर केले.
यावेळी नवनिर्वाचित पंचायत समिती सभापती सुखदेव चोरमले व उपसभापती अमृता गिरमकर यांचा सत्कार आमदार राहुल कुल यांच्या हस्ते करण्यात आला.
✍🏻मुख्य संपादक – संदिप बारटक्के
