वृत्तवेध मarathi | संदिप बारटक्के
दौंड : दौंड–पुणे मार्गावरील डेमू गाड्या अनियमित धावत असल्यामुळे दैनंदिन प्रवाशांना मोठ्या प्रमाणात त्रास सहन करावा लागत आहे. कार्यालयीन वेळेत गाड्या उशिरा धावणे, अचानक रद्द होणे किंवा वेळापत्रकात बदल होणे यामुळे नोकरदार, विद्यार्थी आणि व्यावसायिक वर्गाचे मोठे हाल होत आहेत. या पार्श्वभूमीवर दौंड प्रवासी वर्गाच्या वतीने संबंधित अधिकाऱ्यांकडे निवेदन सादर करण्यात आले.
प्रामुख्याने खालील गाड्यांच्या वेळापत्रकावर परिणाम होत असल्याचे निदर्शनास आणून देण्यात आले :
७१४०२ दौंड–पुणे डेमू (सकाळी ६:०५)
७१४०४ दौंड–पुणे डेमू शटल (सकाळी ७:०५)
७१४०६ बारामती–पुणे डेमू (सकाळी ८:२५)
७१४०७ पुणे–दौंड डेमू (दुपारी ३:००)
७१४११ पुणे–बारामती डेमू (संध्याकाळी ६:४५)
७१४१३ पुणे–दौंड डेमू (रात्री ८:०५)
या सर्व गाड्या वेळेवर धावाव्यात तसेच अनियमिततेला आळा घालण्यासाठी तातडीने उपाययोजना कराव्यात, अशी मागणी प्रवासी वर्गाने केली. यावर विभागीय रेल्वे व्यवस्थापक (डीआरएम) राजेश कुमार वर्मा यांनी संबंधित विभागाला आवश्यक सूचना देत वेळापत्रक सुरळीत करण्याचे आश्वासन दिले.
तसेच प्रायोगिक तत्वावर दौंड–पुणे शटलसाठी अतिरिक्त कोच जोडून लवकरच ट्रायल घेण्यात येणार असल्याचे त्यांनी सांगितले. ट्रायल यशस्वी झाल्यानंतर इतर डेमू लोकल गाड्यांनाही अतिरिक्त कोच जोडण्याबाबत सकारात्मक भूमिका घेण्यात येईल, असेही त्यांनी स्पष्ट केले.
सदर प्रश्न लवकरात लवकर मार्गी लावण्यात येईल, असे आश्वासन डीआरएम राजेश कुमार वर्मा यांनी नगराध्यक्षा दुर्गादेवी जगदाळे -पाटील यांना दिले.
या भेटीदरम्यान दौंड नगरपालिकेचे मुख्याधिकारी अवधूत तावडे व नगरसेवक इंद्रजीत जगदाळे-पाटील उपस्थित होते.
✍🏻मुख्य संपादक – संदिप बारटक्के
