✍️संदिप बारटक्के
दौंड : दौंड नगरपरिषदेचे मुख्याधिकारी अवधुत तावडे यांच्याविरोधात करण्यात आलेल्या गंभीर आरोपांची दखल घेत पुणे जिल्हाधिकारी कार्यालयाच्या नगरपालिका प्रशासन शाखेने दौंड नगरपरिषदेकडून मुद्देनिहाय व स्वयंस्पष्ट अहवाल मागविला आहे. त्यामुळे या प्रकरणाची प्रशासकीय पातळीवर चौकशी होण्याचा मार्ग मोकळा झाला आहे.
पुणे जिल्हाधिकारी कार्यालयाच्या नगरपालिका प्रशासन शाखेकडून दि. १९ जुलै २०२६ रोजी दौंड नगरपरिषदेच्या मुख्याधिकाऱ्यांना यासंदर्भात पत्र पाठविण्यात आले आहे. या पत्रात बाबा उर्फ करीम शेख यांनी दि. २९ जून २०२६ रोजी केलेल्या तक्रारीचा तसेच दि. ८ जुलै २०२६ रोजीच्या आवक क्रमांक १९२० चा संदर्भ देण्यात आला आहे.
तक्रार अर्जामध्ये दौंड नगरपरिषदेचे मुख्याधिकारी अवधुत तावडे यांच्याकडून विविध प्रकरणांमध्ये गंभीर अनियमितता झाल्याचा, भ्रष्टाचारास पाठीशी घातल्याचा, दप्तर दिरंगाई केल्याचा तसेच शासकीय कर्तव्यात कसूर केल्याचा आरोप करण्यात आला आहे. या प्रकरणांची कायदेशीर चौकशी करून संबंधितांवर कडक कारवाई करावी, अशी मागणी तक्रारदाराने केली आहे.
जिल्हाधिकारी कार्यालयाने या तक्रारीची दखल घेत सदर विषय दौंड नगरपरिषदेच्या कार्यक्षेत्रातील व कार्यकक्षेतील असल्याचे नमूद केले आहे. त्यामुळे प्राप्त तक्रार अर्जाच्या अनुषंगाने संबंधित सर्व मुद्द्यांवर वस्तुनिष्ठ, स्पष्ट आणि स्वतंत्रपणे माहिती देणारा मुद्देनिहाय स्वयंस्पष्ट अहवाल जिल्हाधिकारी कार्यालयास सादर करण्याचे निर्देश देण्यात आले आहेत.
हे पत्र मच्छिद्र घोलप, सह आयुक्त, गट-अ, नगरपालिका शाखा, जिल्हाधिकारी कार्यालय, पुणे यांच्या स्वाक्षरीने जारी करण्यात आले आहे. पत्राची प्रत तक्रारदार बाबा उर्फ करीम शेख यांनाही माहितीस्तव देण्यात आली आहे.
चौकशीच्या अहवालाकडे लक्ष,,,
जिल्हाधिकारी कार्यालयाने थेट आरोपांवर निष्कर्ष नोंदविलेला नसून, तक्रारीतील मुद्द्यांवर दौंड नगरपरिषदेचा अधिकृत व कागदोपत्री खुलासा मागविला आहे. त्यामुळे आता नगरपरिषद प्रशासनाकडून कोणता अहवाल सादर केला जातो आणि तक्रारीतील आरोपांबाबत कोणती कागदपत्रे व स्पष्टीकरण दिले जाते, याकडे दौंड शहराचे लक्ष लागले आहे.
✍🏻मुख्य संपादक – संदिप बारटक्के
