✍️ अख्तर काझी
दौंड: विठ्ठल नामाच्या जयघोषात, टाळ मृदुंगाच्या गजरात पंचक्रोशीतील ग्रामदैवतांच्या पालख्या(14) आज आषाढी एकादशीच्या दिवशी शहरातील प्रति पंढरपूर समजल्या जाणाऱ्या विठ्ठलाच्या दर्शनासाठी, भेटीसाठी दाखल झाल्या.
परंपरेप्रमाणे गावचे पाटील वीरधवल जगदाळे, इंद्रजीत जगदाळे व मल्हार जगदाळे यांनी येथील हुतात्मा चौकात पालख्यांचे स्वागत केले.
शहरातील प्रमुख चौकांमध्ये नगरपालिका प्रशासनासह येथील सर्व नगरसेवक तसेच विविध पक्ष संघटनांच्या वतीने वारकरी बांधवांना खिचडी ,साबुदाणा वडे, फळे वाटप करण्यात आले. हजारो भाविकांनी याचा लाभ घेतला.
शहरातील दलित, मुस्लिम, ख्रिश्चन बांधवांच्या वतीने सुद्धा वारकरी भक्तांची फळे देऊन सेवा करण्यात आली. या उपक्रमामुळे शहरातील जातीय सलोखा अबाधित असल्याचे चित्र दिसून आले.
परंपरेप्रमाणे भीमा नदी तीरावर ग्रामदैवतांच्या मूर्तींना स्नान घालित आरती केली गेली. नंतर पालख्या दर्शना साठी येथील विठ्ठल मंदिरात आल्या. संपूर्ण शहरामध्ये भक्तिमय वातावरण होते, एकंदरीतच आजचा पालखी सोहळा अत्यंत आनंदी वातावरणात पार पडला.
✍🏻मुख्य संपादक – संदिप बारटक्के
