✍️अख्तर काझी
दौंड: शहरामध्ये मोकाट फिरणारी जनावरे (गोवंश) सुरक्षित पद्धतीने पकडून गोशाळेमध्ये संवर्धनासाठी पाठविणे कामीचा ठेका नगरपालिकेच्या वतीने येथील किरण डिस्ट्रीब्युटर्स कंपनीला दि.29 सप्टेंबर 2025 रोजी करारनामा करून देण्यात आलेला आहे. त्या अनुषंगाने ठेकेदाराने शहरातील मोकाट फिरणारी जनावरे पकडून गो शाळेत जमा करण्याचे कामास सुरुवात केली होती. मात्र या कामामध्ये पकडलेले असंख्य गाय, बैल गो शाळेत जमा न होता गायब झाले असल्याचे गोरक्षकांच्या निदर्शनास आल्याने त्यांनी या प्रकरणाची जलद गतीने चौकशी करून संबंधितांवर भारतीय न्यायसंहिताच्या विविध कलमांतर्गत फौजदारी गुन्हे दाखल करण्यात यावेत अशी मागणी निवेदनाद्वारे केलेली आहे,
संबंधितांवर कारवाई न झाल्यास दिनांक 13 ऑगस्ट 2026 रोजी पासून दौंड नगरपालिकेच्या कार्यालयासमोर आंदोलन( उपोषण) सुरू करणार असल्याचा इशारा गोरक्षक निखिल स्वामी, अक्षय वाघमारे,आनंद मुनोत, अजय राऊत यांनी दिला आहे.
आमदार राहुल कुल, जिल्हाधिकारी तथा अध्यक्ष प्राणी क्लेश प्रतिबंधक सोसायटी(पुणे) पोलीस निरीक्षक, दौंड तसेच नगरपालिकेचे मुख्याधिकारी यांना निवेदनाची प्रत पाठविण्यात आलेली आहे.
निवेदनामध्ये असे नमूद करण्यात आले आहे की, दौंड नगरपालिकेच्या वतीने शहरातील मोकाट जनावरे( गोवंश) सुरक्षित पद्धतीने पकडून गोशाळेमध्ये संवर्धनासाठी पाठविणे या कामाची निविदा दि.29 सप्टेंबर 2025 रोजी काढण्यात आलेली होती. त्या दिवसापासून दौंड नगरपरिषदेच्या वतीने मोकाट गोवंश पकडण्याचे काम ठेकेदार करीत आहे. संबंधित ठेकेदाराने वेळोवेळी शहरातील पकडलेले गोवंश जिओ टॅग फोटो काढून पुढे श्री बोरमलनाथ गोशाळा ट्रस्ट कडे संवर्धनासाठी पाठविणे आवश्यक होते. सदर गोवंश पकडल्यापासून ते गोशाळेत सोडेपर्यंत नगरपालिकेचे जबाबदार अधिकारी प्रत्येक वेळी हजर राहणे आवश्यक होते. मात्र या पद्धतीने काम न करता नगरपालिकेचे अधिकारी व कर्मचारी यांनी सदर कामात हलगर्जीपणा केल्याचे दिसून येत आहे. संबंधित ठेकेदार यांनी नगरपालिकेबरोबर केलेल्या करारानुसार व त्यांनी सादर केलेल्या पत्रानुसार तसेच दौंड पोलीस स्टेशन यांच्याकडे वाहतूक परवान्यानुसार पकडलेले गोवंश( गाय, बैल) श्री बोरमलनाथ गोशाळा ट्रस्ट या गोशाळेत सोडून तेथील जिओ टॅग फोटो सादर करणे गरजेचे होते. मात्र नगर पालिका प्रशासनाची कोणतीही पूर्व परवानगी न घेता अस्तित्वातच नसलेल्या गो शाळेत पकडलेले गोवंश सोडल्याचा गंभीर प्रकार समोर येत आहे. हा अत्यंत गंभीर प्रकार असून सदर प्रकरणाचे संपूर्ण बिल( रक्कम) आरोग्य विभागातील कर्मचारी व मुख्याधिकारी यांनी संबंधित ठेकेदाराला दिल्याचा प्रकार समोर येत आहे. मुख्याधिकारी ,आरोग्य कर्मचारी व ठेकेदार यांनी संगनमत करून सर्वसामान्य जनतेच्या करातून गोळा झालेल्या निधीवर दरोडा टाकला आहे असा आरोप गोरक्षकांच्या वतीने करण्यात आला आहे.
श्री बोरमलनाथ गोशाळे व्यतिरिक्त गो शाळेत गाय, बैल दिल्याचे दाखले ठेकेदाराने नगरपालिकेकडे सादर केले त्यावेळेसच नगरपालिका प्रशासनाने सदर गोशाळा अस्तित्वात आहे का? चालू स्थितीत आहे का? असल्यास शासनाच्या सर्व परवानग्या गोशाळेकडे आहेत का? दरवर्षी या गोशाळेचे लेखापरीक्षण होते आहे का? या बाबी तपासता मुख्याधिकारी यांनी संबंधित ठेकेदाराला वेळीच समज देणे गरजेचे होते. याउलट कोणत्याही प्रकारची शहनिशा अथवा खात्री न करता बेकायदेशीरपणे गाय, बैल इतरत्र पाठविण्यास संबंधित ठेकेदाराला पाठबळ दिले आहे, त्यामुळे ठेकेदार ,मुख्याधिकारी ,आरोग्य कर्मचारी यांनी संगनमताने शहरातील पकडलेले गाई ,बैल गो शाळेत न पाठवता इतरत्र पाठविलेले सिद्ध होत आहे.
शहरात पकडलेली जनावरे गो शाळेत न जाता त्यांची परस्पर बाहेर विक्री केली जात असल्याची माहिती गोरक्षक निखिल स्वामी, अक्षय वाघमारे यांनी नगरपालिकेला दिलेली होती व नगरपालिकेने संबंधितांवर कायदेशीर कार्यवाही करावी अशी मागणीही केलेली होती. मात्र या गंभीर बाबीकडे दौंड नगरपालिकेचे मुख्याधिकारी व आरोग्य कर्मचारी यांनी सोयीस्कर दुर्लक्ष केले आहे. तर तक्रारी अर्ज प्राप्त झाल्यानंतर सुद्धा ठेकेदाराला लाखोंची बिले अदा करण्यात आली आहे अशी माहिती निवेदनातून देण्यात आली आहे. संपूर्ण प्रकरणाची गंभीर दखल घेऊन संबंधित ठेकेदार, मुख्याधिकारी व आरोग्य विभागातील कर्मचारी यांच्यावर दि.10 ऑगस्ट 2026 पूर्वी गुन्हे दाखल करण्यात यावे अन्यथा 13 ऑगस्ट 2026 रोजी पासुन बेमुदत आंदोलन करण्यात येणार असल्याचा इशारा आंदोलकांनी निवेदनातून दिला आहे.
✍🏻मुख्य संपादक – संदिप बारटक्के
