वृत्तवेध मarathi / संदिप बारटक्के
जिद्द, चिकाटी आणि अथक परिश्रमांच्या जोरावर यशाची उत्तुंग शिखरे गाठणाऱ्या भीमथडी शिक्षण संस्थेच्या स्वर्गीय किसनदास गुलाबचंद कटारिया महाविद्यालयातील माजी विद्यार्थ्यांचा भव्य सत्कार सोहळा नुकताच संस्थेच्या मुख्य कार्यालयात उत्साहात पार पडला. प्रतिकूल परिस्थितीवर मात करत शासकीय सेवेत आपले स्थान निर्माण करणाऱ्या या गुणवंत विद्यार्थ्यांनी संस्थेच्या आणि महाविद्यालयाच्या नावलौकिकात मानाचा तुरा रोवला आहे.
या प्रेरणादायी सोहळ्यात प्रदीप साळुंखे (पुणे पोलीस), स्वप्नील गायकवाड (पुणे शहर पोलीस), आकाश वन्ने (रायगड जिल्हा पोलीस), प्रथमेश राठोड (महाराष्ट्र सुरक्षा बल – MSF) आणि करण बळवतकर (MPSC मार्फत महसूल सहाय्यक व कालवा निरीक्षक) या विद्यार्थ्यांचा त्यांच्या उल्लेखनीय कामगिरीबद्दल सत्कार करण्यात आला. संस्थेचे मानद सचिव प्रेमसुख कटारिया यांच्या हस्ते या गुणवंतांचा सन्मान करण्यात आला. यावेळी प्रथमेश राठोड यांच्या मातोश्रींची उपस्थिती हा क्षण अधिक भावनिक ठरला; त्यांच्या कष्टांचे फळ मिळाल्याची जाणीव उपस्थितांना झाली.
यावेळी सामाजिक बांधिलकी जपणाऱ्या व्यक्तिमत्त्वांचा गौरव करण्याची परंपरा जपत पर्यावरणदूत प्रल्हाद जाधव यांचा विशेष सत्कार करण्यात आला. दौंड परिसरात वृक्षारोपण, महाकाय वृक्षांचे शास्त्रीय पुनर्रोपण तसेच प्राणी-पक्षी आणि सर्पमित्र म्हणून त्यांनी केलेले कार्य समाजासाठी प्रेरणादायी ठरत आहे.
विद्यार्थ्यांच्या यशामागे क्रीडा मार्गदर्शकांचा मोलाचा वाटा असल्याचे यावेळी अधोरेखित करण्यात आले. क्रीडा मार्गदर्शक माधव बागल सर यांच्या प्रशिक्षण, शिस्तबद्ध मार्गदर्शन आणि सातत्यपूर्ण प्रयत्नांमुळेच हे विद्यार्थी ‘खाकी’ सेवेसाठी सक्षम बनले आहेत. यावेळी बागल सरांचा संपूर्ण विद्यार्थी परिवार—सुमित दळवी, रोहित ठाकूर, रोहित त्रिभुवन, चैतन्य यांसह अनेक तरुण खेळाडू मोठ्या संख्येने उपस्थित होते आणि त्यांनी आपल्या गुरुंच्या कार्याचा गौरव अनुभवला.
या उल्लेखनीय यशाबद्दल संस्थेचे चेअरमन विक्रम कटारिया तसेच महाविद्यालयाचे प्राचार्य डॉ. सुभाष समुद्र यांनी सर्व विद्यार्थ्यांचे अभिनंदन करत त्यांच्या पुढील वाटचालीस शुभेच्छा दिल्या. “शासकीय सेवेत कार्य करताना समाजहित जपावे आणि आपल्या कार्यातून इतरांसाठी आदर्श निर्माण करावा,” असा संदेश त्यांनी दिला.
या सोहळ्यास संस्थेचे उपाध्यक्ष गोविंद अग्रवाल, क्रीडा शिक्षक भोसले सर, फारूक शेख सर, क्रीडा मार्गदर्शक माधव बागल सर, श्रीकृष्ण ननवरे सर तसेच इतर मान्यवर उपस्थित होते.
या गौरव सोहळ्यामुळे दौंड परिसरातील तरुणांमध्ये नवचैतन्य निर्माण झाले असून, जिद्द आणि मेहनतीच्या जोरावर कोणतेही यश प्राप्त करता येते, याची प्रचीती पुन्हा एकदा सर्वांना आली.
✍🏻मुख्य संपादक – संदिप बारटक्के
