वृत्तवेध मarathi / संदिप बारटक्के
दौंड : अमली पदार्थांच्या विरोधात दौंड पोलिसांनी मोठी कारवाई करत तब्बल ५२ किलो ३० ग्रॅम गांजा जप्त केला असून एका आरोपीस अटक केली आहे. या कारवाईमुळे दौंड परिसरात मोठी खळबळ उडाली आहे.
दौंड पोलिसांनी दिलेल्या माहितीनुसार, दिनांक २४ एप्रिल २०२६ रोजी पहाटे ३ वाजण्याच्या सुमारास, दौंड पोलीस स्टेशनचे पोलीस निरीक्षक गोपाळ पवार यांना गोपनीय माहिती मिळाली होती की, MP 09 AT 2117 क्रमांकाच्या कारमधून काही इसम बेकायदेशीररीत्या अहिल्यानगरकडून साताऱ्याकडे गांजा घेऊन वाहतूक करणार आहेत.
या माहितीच्या आधारे पोलिस निरीक्षक गोपाळ पवार यांनी तात्काळ पोलीस पथक तयार करून दौंड-पाटस रोडवरील रेल्वे उड्डाण पुलाजवळ नाकाबंदी केली. नाकाबंदी दरम्यान संशयित कार दिसताच पोलिसांनी चालकाला गाडी थांबण्याचा इशारा केला. मात्र चालकाने पोलिसांचा इशारा धुडकावून लावत बॅरिकेट्सला चकवा देत पळ काढण्याचा प्रयत्न केला.
यावेळी आरोपीने पुढे असलेल्या MP 13 ZV 8824 या वाहनाला पाठीमागून जोरात धडक दिली. त्यानंतर पोलिसांनी तत्परता दाखवत पाठलाग करून वाहन अडवले व चालकाला ताब्यात घेतले.
चौकशी केली असता आरोपीचे नाव मुकेश धर्मिया कणोजे (वय ३६ वर्षे, रा. बलवाडी, ता. बडवानी, मध्यप्रदेश) असे असल्याचे समोर आले. त्याच्या ताब्यातील कारची झडती घेतली असता, ५ प्लास्टिक पॅकेट्समध्ये चिकटपट्टीने गुंडाळलेला एकूण ५२ किलो ३० ग्रॅम गांजा आढळून आला. या गांज्याची बाजारातील अंदाजे किंमत १३ लाख ७ हजार ५०० रुपये इतकी आहे.
जप्त मुद्देमाल:
५२ किलो ३० ग्रॅम गांजा – ₹१३,०७,५००
किया सोनेट कार (MP 09 AT 2117) – ₹१०,००,०००
या प्रकरणी दौंड पोलीस स्टेशनमध्ये गु.र. नं. २५६/२०२६ अन्वये एनडीपीएस कायदा १९८५ मधील कलम ८ (c), २० (B) अंतर्गत गुन्हा दाखल करण्यात आला आहे. पुढील तपास पोलीस उपनिरीक्षक रुपेश कदम करत आहेत.
सदर कारवाई पोलीस अधीक्षक संदीपसिंह गिल्ल, अपर पोलीस अधीक्षक गणेश बिरादार, तसेच उपविभागीय पोलीस अधिकारी बापुराव दडस यांच्या मार्गदर्शनाखाली पार पडली. या मोहिमेत पोलीस निरीक्षक गोपाळ पवार, पो.स.ई. रुपेश कदम, चौधरी, साळुंखे तसेच इतर पोलीस अधिकारी व कर्मचाऱ्यांनी सहभाग घेतला.
या यशस्वी कारवाईमुळे दौंड पोलिसांनी अमली पदार्थांच्या विरोधात कठोर भूमिका घेतल्याचे स्पष्ट झाले असून गुन्हेगारीविरोधातील त्यांची सजगता पुन्हा अधोरेखित झाली आहे.
✍🏻मुख्य संपादक – संदिप बारटक्के
